پرەزيدەنت قاسىم-جومارت توقايەۆ قازاقستاندىقتاردى ناۋرىز مەيرامىمەن قۇتتىقتادى.

– ءقازىر دۇنيەدە گەوساياسي دۇربەلەڭ بەلەڭ الىپ، حالىقارالىق تارتىستار شيەلەنىسە تۇسۋدە. كوروناۆيرۋس ىندەتى ءورشىپ، الەم ەكونوميكاسىنداعى داعدارىس كۇشەيۋدە. وسىنداي كۇردەلى كەزەڭدە قازاقستان حالقى بارلىق سىن-قاتەرلەرگە توتەپ بەرۋ ءۇشىن بىرلىگىن بەكەمدەپ، قايسارلىق تانىتۋى قاجەت. 

ءبىزدىڭ بابالارىمىز ەجەلدەن ۇلىستىڭ ۇلى كۇنى بىر-بىرىنە كومەكتەسىپ، قيىن كەزەڭدە قولىنداعى بارىن بولىسكەن. وسى يگى ءداستۇردى حالقىمىز ءالى كۇنگە دەيىن بەرىك ۇستانىپ كەلە جاتقانى كوڭىل قۋانتادى. 

پاندەميا كەزىندە ونداعان مىڭ دارىگەر مەن مەيىربيكە، ءتارتىپ ساقشىلارى مەن اسكەري قىزمەتشىلەر جانە ەرىكتىلەر ەلدىڭ دەنساۋلىعىن ساقتاۋ ءۇشىن ايانباي ەڭبەك ەتۋدە. ميكروبيولوگ ماماندارىمىز از ۋاقىتتىڭ ىشىندە كوروناۆيرۋسقا قارسى ۆاكسينا جاساپ شىعاردى. 

ءاز-ناۋرىز – ىزگىلىك پەن قايىرىمدىلىقتىڭ، مەيىرىم مەن جاناشىرلىقتىڭ مەرەكەسى. ءبىز ۇسىنعان ادىلەتتى قوعام جانە الەۋمەتتىك مەملەكەت قاعيداسى وسى قۇندىلىقتارمەن تولىق ۇندەسەدى.

بيىل ءبىز تاريحي مەجە – تاۋەلسىزدىكتىڭ 30 جىلدىعىن اتاپ وتەمىز. وسى ۋاقىتتىڭ ىشىندە ەلىمىز تولاعاي تابىسقا جەتتى. ءبىراق، جەتىستىككە مارقايىپ، بوساڭسۋعا بولمايدى. ءبىز مەملەكەتىمىزدى جۇيەلى وزگەرىستەرگە جەتەلەيتىن اۋقىمدى رەفورمالاردى جالعاستىرا بەرەمىز.

جان-جاقتى جاڭعىرۋ ۇلتىمىزدى ورگە باستاپ، قازاقستاننىڭ ماڭگىلىك ەل بولۋىنا جول اشادى. ءبىزدىڭ باستى ماقساتىمىز – وسى!" دەلىنگەن رەسمي سايت تاراتقان حابارلامادا.