پاۆلودار وبلىسىنىڭ اكىمى ءابىلقايىر سقاقوۆ "Grammy" سىيلىعىن جەڭىپ العان يمانبەك زەيكەنوۆكە كورىمدىك رەتىندە 2 ملن تەڭگە بەردى. مۋزىكانت بەرىلگەن قاراجاتتى قايىرىمدىلىققا جۇمساماق.

يمانبەك زەيكەنوۆ ءوزىنىڭ تۋعان قالاسى اقسۋعا ورالىپ، جاستارمەن كەزدەستى.

وبلىس اكىمىنىڭ اتىنان ديدجەيگە زاماناۋي تەحنيكا الۋىنا جانە "پرەميا العانى ءۇشىن كورىمدىك" رەتىندە 2 ميلليون تەڭگە بەرىلگەن.

– وتە قۋانىشتىمىن. مەنىڭ زاماناۋي تەحنيكام بار. سول ءۇشىن بۇل قاراجاتتى قايىرىمدىلىققا بەرگىم كەلەدى. تۋعان قaلامنان كوشۋدى جوسپارلاپ جاتقان جوقپىن. بولاشاقتا مۋزىكامەن اينالىسقىم كەلەدى. قازىرگى ۋاقىتتا شون پولمەن بىرلەسكەن تۋىندى جازىپ جاتىرمىز، – دەدى مۋزىكانت. 

ايتا كەتەيىك، قازاقستاندىق مۋزىكانت يمانبەك زەيكەنوۆتىڭ SAINt JHN اتتى ءانشىنىڭ Roses انىنە جازىلعان رەميكسى Grammy سىيلىعىنىڭ "ۇزدىك رەميكس" نوميناسياسىن جەڭىپ العان بولاتىن. 

Grammy سىيلىعى – امەريكانىڭ ۇلتتىق دىبىس جازۋ ونەرى جانە عىلىم اكادەمياسى (NARAS) تاپسىراتىن مارتەبەلى ماراپات. 

بيىل Grammy سىيلىعى 63ء-شى رەت ۇيىمداستىرىلدى. 20 جاستاعى يمانبەك زەيكەنوۆ – شىعارماسى Grammy سىيلىعىنا ۇسىنىلعان ءارى جەڭگەن العاشقى قازاقستاندىق.