پرەزيدەنت قاسىم-جومارت توقايەۆ "حالىقارالىق قارىز ارحيتەكتۋراسى جانە وتىمدىلىك" اتتى جوعارى دەڭگەيدەگى جيىندا ءسوز سويلەدى. بۇل تۋرالى اقوردا سايتى حابارلادى.

سايت مالىمەتىنشە، مەملەكەت جانە ۇكىمەت باسشىلارى دەڭگەيىندەگى ونلاين فورۋم COVID-19 پاندەمياسى كەزەڭىندە حالىقارالىق كۇش-جىگەردى دامۋ باعىتىن قارجىلاندىرۋ سالاسىنا قاراي جۇمىلدىرۋعا ارنالعان.

"تەڭىزگە شىعاتىن جولى جوق دامۋشى مەملەكەتتەر توبىنىڭ ءتوراعاسى رەتىندە ءسوز سويلەگەن قاسىم-جومارت توقايەۆ كوروناۆيرۋس پاندەمياسى باستالعالى بەرى توپقا مۇشە ەلدەر شەتەلدىك ينۆەستيسيالاردىڭ ازايۋى، ساۋدا-ساتتىق پەن اقشا اۋدارىمدارىنىڭ تومەندەۋى، قارجىلىق قارىزداردىڭ ءوسۋى، ورتاشا العاندا ەكونوميكانىڭ 2،4 پايىزعا قۇلدىراۋىنا سەبەپ بولعان بيۋدجەت مۇمكىندىگىنىڭ ايتارلىقتاي كەمۋى سەكىلدى اسا ءقاۋىپتى قۇبىلىستارمەن بەتپە-بەت كەلگەنىن اتاپ ءوتتى" دەلىنگەن حابارلامادا.

پرەزيدەنت جاھاندىق قارجى قۇرىلىمدارىن، بۇۇ ينستيتۋتتارىن، سونداي-اق، وزگە دە حالىقارالىق جانە وڭىرلىك ۇيىمداردى تەڭىزگە شىعاتىن جولى جوق دامۋشى مەملەكەتتەر توبىنا مۇشە ەلدەردىڭ ەكونوميكالىق ءوسىمدى قايتا قالپىنا كەلتىرۋگە باعىتتالعان ءىس-قيمىلى كەزىندە ولاردىڭ ەرەكشە قاجەتتىلىكتەرىنە باسا ءمان بەرۋگە شاقىردى.

سونىمەن قاتار پرەزيدەنت توقايەۆ بۇۇ-نىڭ تەڭىزگە شىعاتىن جولى جوق دامۋشى مەملەكەتتەر توبىنا مۇشە ەلدەرگە ارنالعان ۆەنا باعدارلاماسىن جۇزەگە اسىرۋ جونىندەگى جول كارتاسىنىڭ وزەكتىلىگى ارتا تۇسكەنىنە توقتالدى. وسىعان وراي سەرىكتەس مەملەكەتتەردى ادديس-ابەبا باعدارلاماسىندا بەلگىلەنگەن بارلىق جەتى باعىت بويىنشا جۇرگىزىلەتىن جۇمىستاردى جۇمىلا اتقارۋعا، سونداي-اق دامىتۋ ماقساتىنداعى رەسمي كومەكتىڭ قازىرگى دەڭگەيىن ساقتاپ قالۋعا ۇندەدى.

فورۋمعا ارگەنتينا، ۆەنەسۋەلا، ەگيپەت، يتاليا، كانادا، پاكىستان، تۇركيا، قاتار، فرانسيا، ەكۆادور، جاپونيا، يامايكا جانە باسقا دا مەملەكەتتەردىڭ باسشىلارى، سونداي-اق، بۇۇ باس حاتشىسى انتونيۋ گۋتەرريش، حالىقارالىق ۆاليۋتا قورىنىڭ، ەكونوميكالىق ىنتىماقتاستىق جانە دامۋ ۇيىمىنىڭ، دۇنيەجۇزىلىك بانكتىڭ، دۇنيەجۇزىلىك ساۋدا ۇيىمىنىڭ، ەۋروپالىق وداق پەن افريكالىق وداقتىڭ جەتەكشىلەرى قاتىستى.