قازاقستان "بۇۇ-نىڭ گۋمانيتارلىق كومەك كورسەتۋ جونىندەگى جاھاندىق جوسپارىن" جۇزەگە اسىرۋعا ەلەۋلى ۇلەس قوستى. بۇل تۋرالى پرەزيدەنت قاسىم-جومارت توقايەۆ "حالىقارالىق قارىز ارحيتەكتۋراسى جانە وتىمدىلىك" اتتى جوعارى دەڭگەيدەگى جيىندا حابارلادى.
مەملەكەت باسشىسى حالىقارالىق قوعامداستىقتى تەڭىزگە شىعاتىن جولى جوق دامۋشى مەملەكەتتەر توبىنا مۇشە ەلدەردىڭ دەنساۋلىق ساقتاۋ جۇيەسىن دامىتۋدى قولداۋعا، سونداي-اق قاجەتتى ۆاكسينانى ۋاقىتىلى جانە ءتيىمدى باعادا ساتىپ الۋىنا كومەك كورسەتۋگە شاقىردى. پرەزيدەنت توپقا مۇشە ەلدەردىڭ ورنىقتى ينفراقۇرىلىمىن ىنتالداندىرۋ جانە ساۋدا-ساتتىق راسىمدەرىن جەڭىلدەتۋ، سيفرلىق ترانسفورماسياعا قول جەتكىزۋىنە قولداۋ كورسەتۋ قاجەتتىگى تۋرالى اتاپ ءوتىپ، جەكە سەكتوردىڭ قايتا قالپىنا كەلتىرۋ جۇمىستارىنا بەلسەندى قاتىسۋ كەرەكتىگىن ايتتى.
توقايەۆ مەملەكەتتىك دەڭگەيدە قابىلدانىپ جاتقان شارالارعا توقتالىپ، قازاقستان "بۇۇ-نىڭ گۋمانيتارلىق كومەك كورسەتۋ جونىندەگى جاھاندىق جوسپارىن" جۇزەگە اسىرۋعا ەلەۋلى ۇلەس قوسقانىن جانە كوروناۆيرۋسقا قارسى كۇرەس كەزىندە ءبىرقاتار شەت مەملەكەتتەرگە جاردەم بەرگەنىن ەسكە سالدى.
قاسىم-جومارت توقايەۆ ءسوز سوڭىندا ۆاكسينا سالۋعا جانە ەكونوميكانى قايتا قالپىنا كەلتىرۋگە ءبىرشاما ۋاقىت كەتىپ، سوعان سايكەس ۇزاقمەرزىمدى پەرسپەكتيۆادا ونىڭ سالدارى ونداعان جىلدار بويىنا ساقتالۋى ىقتيمال ەكەنى جايىنداعى بولجامىن ورتاعا سالدى. ونىڭ پىكىرىنشە، ازاماتتاردىڭ وسال توپتارىن، ەلدەر مەن ەكونوميكانى قورعاۋ ءۇشىن قازىرگى قابىلدانىپ جاتقان شارالاردىڭ بارلىعى ورتاق مۇددەنى كوزدەيدى. مەملەكەت باسشىسى مۇنىڭ داعدارىستان شىعاتىن بىردەن-بىر جول ەكەنىنە سەنىمدى جانە ونى حالىقارالىق قوعامداستىقتىڭ ورتاق مىندەتى دەپ سانايدى.
پىكىر قالدىرۋ