دەنساۋلىق ساقتاۋ مينيسترلىگى 26 مامىر كۇنگى ەپيدەميولوگيالىق احۋال تۋرالى اقپاراتتى جاريالادى.
وعان ساي، ءبىر تاۋلىكتە 1747 ادامنان كوروناۆيرۋس انىقتالىپ، 24 ادام كوز جۇمعان، 80 ناۋقاستان پنيەۆمونيا تابىلىپ، 2 ادام قايتىس بولعان.
مينيسترلىك مالىمەتىنشە، قازاقستاندا كوروناۆيرۋس العاش انىقتالعان 2020 جىلعى 13 ناۋرىزدان 2021 جىلعى 27 مامىرعا دەيىن 381 907 ادام كوروناۆيرۋس جۇقتىرعان. ونىڭ ىشىندە 3903 ادام قايتىس بولعان. وسى ارالىقتى 55024 ادامنان پنيەۆمونيا تابىلىپ، 3351 ادام كوز جۇمعان.
28 مامىرداعى مالىمەت بويىنشا، 30 153 ادام كوروناۆيرۋس ينفەكسياسىنان ەمدەلىپ جاتىر. ولاردىڭ ىشىندە 11 432 پاسيەنت ستاسيوناردا، 18 721 ناۋقاس امبۋلاتوريالىق دەڭگەيدە ەم قابىلداۋدا.
كوروناۆيرۋسقا شالدىققانداردىڭ اراسىندا 665 ادامنىڭ جاعدايى اۋىر، 154 پاسيەنتتىڭ جاعدايى وتە اۋىر، 101 ناۋقاس ءوجج اپپاراتىندا جاتىر.
دسم مامىردا پنيەۆمونيادان قايتىس بولعانداردىڭ سانىن كۇرت كوبەيتىپ، وعان 3 مىڭعا جۋىق ادام قوسقان. مينيسترلىك بۇل سانداردىڭ ولگەندەر ستاتيستيكاسىنا دەر كەزىندە قوسىلماۋىن دەرەكتەردىڭ قاعازدا بولىپ كەلۋىمەن، ەلەكتروندىق بازاعا كەش كىرگىزىلۋىمەن تۇسىندىرگەن.
قازاقستاندا كوروناۆيرۋس ستاتيستيكاسىنا بايلانىستى بىرنەشە رەت داۋ تۋعان. باستاپقىدا پنيەۆمونيا ستاتيستيكاسى مۇلدە جۇرگىزىلمەدى. دۇنيەجۇزىلىك دەنساۋلىق ساقتاۋ ۇيىمىنىڭ ماماندارى مەن الەمنىڭ بىرنەشە ەلىنىڭ جانە قازاقستاننىڭ باسپا ءسوز قۇرالدارى ماسەلەگە نازار اۋدارعان سوڭ 2020 جىلعى 1 تامىزدان باستاپ مينيسترلىك پنيەۆمونيا ستاتيستيكاسىن جۇرگىزە باستادى.
قوعامدا بيلىك كوروناۆيرۋستان قايتىس بولعاندار ستاتيستيكاسىن ادەيى تومەندەتىپ كورسەتىپ وتىر دەگەن پىكىر بار. ستاتيستيكا كوميتەتى جاريالاعان دەرەككە ساي، 2020 جىلعى مامىر-شىلدە ارالىعىندا الدىڭعى جىلدارعا قاراعاندا ءولىم جاعدايى 30 مىڭعا ارتىق تىركەلگەن.
دسم كوروناۆيرۋس جۇقتىرىپ قايتىس بولعان كەي ازاماتتاردىڭ ستاتيستيكاعا ەنبەۋىن ولاردىڭ جاناما سىرقاتتاردان كوز جۇمعانىمەن تۇسىندىرەدى.
2021 جىلعى 28 مامىرداعى مالىمەت بويىنشا قازاقستاندا 2 076 841 ادام ۆاكسينا سالدىرعان.
پىكىر قالدىرۋ