ءبىلىم جانە عىلىم مينيسترلىگى ماگيستراتۋرا مەن دوكتورانتۋراعا ءتۇسۋ ەرەجەلەرىن جاريالادى.

ماگيستراتۋرانىڭ ءبىلىم بەرۋ باعدارلامالارى بويىنشا وقۋعا ءتۇسۋ ءۇشىن حالىقارالىق سەرتيفيكاتتاردى ۇسىنۋعا نەمەسە كەشەندى تەستىلەۋ (كت) بارىسىندا شەت تىلىنەن تەست تاپسىرۋعا بولادى.

دوكتورانتۋرانىڭ ءبىلىم بەرۋ باعدارلامالارى بويىنشا وقۋعا ءتۇسۋ ءۇشىن شەت ءتىلىن مەڭگەرگەندىگىن راستايتىن سەرتيفيكات مىندەتتى.

سونىمەن قاتار Duolingo English Test 2021-2022 وقۋ جىلىنا ماگيستراتۋرا مەن دوكتورانتۋراعا ءتۇسۋ كەزىندە شەت ءتىلىن مەڭگەرگەنىن راستايتىن حالىقارالىق سەرتيفيكاتتار تىزىمىنەن شىعارىلادى.

ماگيستراتۋراعا تۇسۋگە ارنالعان كەشەندى تەستىلەۋگە قاتىسۋ ءۇشىن تىركەۋ 18 ماۋسىم كۇنى باستالادى.

تىركەۋ بعم ۇلتتىق تەستىلەۋ ورتالىعىنىڭ app.testcenter.kz سايتىندا جۇرگىزىلەدى. ەمتيحاندار 20 شىلدەدەن باستالىپ، 10 تامىزعا دەيىن جالعاسادى.

ماگيستراتۋراعا ءتۇسۋ فورماتىندا بيىل ەشقانداي وزگەرىس جوق. تەستىلەۋ ناتيجەلەرىمەن كەلىسپەگەن جاعدايدا تەستىلەنۋشى كت اياقتالعاننان كەيىن 30 مينۋتتىڭ ىشىندە اپەللياسياعا ءوتىنىش بەرە الادى.

– ماگيستراتۋراعا تۇسۋگە ارنالعان تەستىلەۋ 3 بولىمنەن تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان جانە ءبىلىم بەرۋ باعدارلامالارى توبىنىڭ بەيىنى بويىنشا تەست. شەت ءتىلىن مەڭگەرۋدىڭ جالپى حالىقارالىق قۇزىرەتتەرىنە (ستاندارتتارىنا) سايكەس شەت ءتىلىن مەڭگەرگەنىن راستايتىن ءبىر حالىقارالىق سەرتيفيكاتى بار ماگيستراتۋراعا تۇسۋشىلەر شەت ءتىلى بويىنشا كەشەندى تەستىلەۋدەن بوساتىلادى، – دەدى بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ.

2021-2022 وقۋ جىلىنا ماگيستراتۋراعا 13 263 گرانت بولىنگەن. بيىل ماگيستراتۋرا مەن دوكتورانتۋراعا ءتۇسۋ ءۇشىن شەكتى بالل – 75، وقۋعا اقىلى نەگىزدە ءتۇسۋ – 50 بالل.

دوكتورانتۋراعا ءوتىنىش قابىلداۋ 3 شىلدەدە باستالىپ، 3 تامىزعا دەيىن جالعاسادى.

دوكتورانتۋراعا ءتۇسۋ ەمتيحاندارى 4-20 تامىز ارالىعىندا وتەدى. وسى رەتتە دوكتورانتۋراعا ءتۇسۋ ءۇشىن ءبىر عانا جوعارى وقۋ ورنىن جانە ءبىر ءبىلىم بەرۋ باعدارلامالارىنىڭ توبىن تاڭداۋعا بولادى.

– دوكتورانتۋراعا ءتۇسۋ ءۇشىن وتىنىشتەر جوعارى وقۋ ورىندارىنىڭ قابىلداۋ كوميسسيالارى ارقىلى قابىلدانادى. بۇدان ءارى وتىنىشتەر ۇلتتىق تەستىلەۋ ورتالىعىنىڭ اقپاراتتىق جۇيەسىندە تىركەلەدى. وقۋعا تۇسۋشىلەر وڭىرلىك تەستىلەۋ ورتالىقتارىندا ءتۇسۋ ەمتيحاندارىن تاپسىرادى. مادەنيەت جانە سپورت مينيسترلىگى مەن دەنساۋلىق ساقتاۋ مينيسترلىگىنە ۆەدومستۆولىق باعىنىستى جوعارى وقۋ ورىندارىنا تۇسۋشىلەر ەمتيحانداردى ءوز جوعارى وقۋ ورىندارىنىڭ بازاسىندا تاپسىرادى، – ءا. تويبايەۆ.

2021-2022 وقۋ جىلىنا PhD ماماندارىن دايارلاۋعا ارنالعان مەملەكەتتىك گرانت سانى 1890 گرانتتى قۇرايدى.