ەلباسىنىڭ رەسەي فەدەراسياسىنا جۇمىس ساپارى اياسىندا تالقىلانعان ماسەلەنىڭ ءبىرى قازاق حالقى ءۇشىن كيەلى سانالاتىن كەنەسارى حاننىڭ سۇيەگىن ىزدەستىرۋ جانە ونى قازاقستانعا قايتارۋ تاقىرىبى بولدى. بۇل تۋرالى ەلباسى كەڭەسشىسى ءارى باسپا ءسوز حاتشىسى ايدوس ۇكىبايەۆ ءمالىم ەتتى.
"كەلىسسوزدەر بارىسىندا نۇرسۇلتان ءابىش ۇلى رەسەي پرەزيدەنتىنەن وسى پروسەسكە كومەك كورسەتۋىن سۇرادى. ەلباسى قازاقتىڭ سوڭعى حانىنىڭ سۇيەگى ءوزىنىڭ تۋعان جەرىندە جەرلەنىپ، رۋحىنىڭ تىنىش تابۋى قازاق حالقى ءۇشىن اسا ماڭىزدى ماسەلە ەكەنىن ايرىقشا اتاپ ءوتتى. ۆلاديمير ۆلاديميروۆيچ پۋتين تۇڭعىش پرەزيدەنتتى رەسەي تاراپىنىڭ بۇل ماسەلەدە جان-جاقتى كومەك كورسەتەتىنىنە سەندىردى. ءپۋتيننىڭ سوزىنە قاراعاندا، ارتەفاكت تابىلادى جانە قازاقستان حالقىنا قايتارىلادى" دەلىنگەن ۇكىبايەۆ حابارلاماسىندا.
بۇعان دەيىن تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ كەنەسارى حاننىڭ باس سۇيەگى تابىلعانىن ايتىپ، حالىقتان ءسۇيىنشى سۇراعان. ارتىنشا، ونىڭ قايدا ەكەنىن ايتا ايمايتىنىن ءمالىم ەتكەن. ال تاريح عىلىمدارىنىڭ دوكتورى، اكادەميك حانگەلدى ءابجانوۆ قامشى پورتالىنا بەرگەن سۇحباتتا قابىلدينوۆ مالىمدەمەسى اسىعىستىق بولعانىن، مۇنداي ماسەلە مەملەكەت باسشىلار دەڭگەيىندە شەشىلۋگە ءتيىس ەكەنىن ايتقان.
پىكىر قالدىرۋ