ەلباسى نۇرسۇلتان نازاربايەۆ شەتەلدە جۇرگەن وپپوزيسيونەرلەردى "قورقاقتارعا" تەڭەدى. بۇلاي دەپ ول "شتريحي ك پورترەتۋ" دەرەكتى ءفيلمىنىڭ كەزەكتى بولىمىندە ايتتى.
– ولار قورقاقتار. ەگەر ءبىر نارسە ايتقىڭ كەلسە، ەلگە كەلىپ ايت. وزىڭە سەنىمدى بولساڭ، بارلىق اۋىرتپالىقتى ءوزىڭ كوتەر، دالەلدە. ەلدەن اقشا ۇرلاۋ ادىلەتتى ەمەس. ەڭ وكىنىشتىسى، ولاردىڭ بارلىعىن مەن كوتەردىم. ءبىرىن مينيستر، ءبىرىن بانكير، ءبىرىن باي قىلدىم. ۇرلايتىنىن ۇرلاپ، تەكسەرۋ باستالعان كەزدە، ەلدەن قاشىپ كەتتى. ءبارى سونداي. سول جاقتا تۇراتىنداردىڭ بىردە-بىرى جانجالسىز كەتپەدى. ونداي ادام جوق. سول ءۇشىن مەن قىنجىلامىن، – دەدى نازاربايەۆ.
سونداي-اق ول "ساتقىنداردىڭ ءومىرى جاقسىلىقپەن اياقتالمايدى" دەپ سانايتىنىن جەتكىزدى.
– ساتقىندىق ماعان ۇنامايدى. ساتقىنداردىڭ ءومىرى جاقسىلىقپەن اياقتالمايدى. ولاردىڭ جۇرەگىندە "قۇرت" تۇرادى سول "قۇرت" ولاردى ىشتەي جەگىدەي جەيدى. ولار وزدەرىنىڭ دۇرىس جاساماعانىن، ءوز حالقىنا، مەملەكەتىنە قارسى شىققانىن بىلەدى. سوندىقتان مەن ەش ۋايىمدامايمىن. ساتقىندار وزدەرىنە ءتيىستىنى الادى، – دەدى ول.
پىكىر قالدىرۋ