نۇرسۇلتان نازاربايەۆ ەل استاناسىن الماتىدان اقمولاعا اۋىستىرۋعا شەشىم قابىلدانار تۇستا تۇسىندە قاراساي باتىردىڭ قىزىل جولبارىسىن كورگەنىن، سول تۇستەن كەيىن استانانى اۋىستىرۋعا بەل بۋعانىن ايتتى. بۇلاي دەپ ول "Nur-Sultan. قولتاڭبا" دەرەكتى فيلمىندە مالىمدەدى. 

– ەلوردانى اۋىستىرۋعا شەشىم قابىلداعان كەزدە كوبى مەنى تۇسىنبەدى. ول كەزدە كەڭەس وداعى قۇلاپ، ءبىز جەكە ءوز جولىمىزبەن كەتتىك. زەينەتاقى تولەۋگە قارجى جوق. مۇعالىمدەر مەن دارىگەرلەرگە جالاقى تولەۋ قيىن بولىپ تۇرعاندا استانانى اۋىستىرۋ تۋرالى شەشىم قابىلدانىپ وتىر. سارا الپىس قىزى "ەلدىڭ ءبارى قارسى بولىپ جاتقاندا بۇنى قالاي جاساماقسىڭ؟" دەپ سۇرادى. "مەن سەنى اۋىلىڭا اپارا جاتىرمىن عوي، نۇرانىڭ جاعاسىنا دەدىم"،  دەيدى نازاربايەۆ ەل استاناسىن اۋىستىرۋ يدەياسى تۋعان جىلدار تۋرالى. 

ول استانا اۋىستىرۋ ارقىلى ساياسي تاعدىرىن بايگەگە تىككەنىن ايتتى.

– وسى ۋاقىتقا دەيىن تالاي تاۋەكەلگە باردىم عوي. سول تاۋەكەلدەردىڭ ەڭ ۇلكەنى –  استانانى سالۋ بولدى. ءبىراق ءبارى ورىندالدى. ينتۋيسيا دەگەن بار عوي. مەن ءوزىم سوعان سەنەمىن. اللادان تىلەپ جاتاسىڭ عوي. سول كەزدە ويىڭا ءبىر سىبىر كەلەدى، وسىلاي دۇرىس دەگەن، – دەدى ول. 

ەلباسى شەشىم قابىلداۋ كورگەن ءتۇسى ىقپال ەتكەنىن دە ايتا كەتتى.

– ءبىر كۇنى تۇسىمدە انام مارقۇم ەكى جولبارىستى جەتەكتەپ، ۇيگە كىرىپ كەلدى. جاڭاعى جاتقان جولبارىس باسىن كوتەرىپ، “بارلىعى دۇرىس بولادى، قورىقپا، جاسا…” دەپ قازاقشا سويلەپ كەتتى.سول ۋاقىتتا ەل استاناسىن اۋىستىرۋدى ويلاپ، ءبىراق ناقتى شەشىمگە كەلە الماي ءجۇردىم. الگى جاعداي ماعان ءبىراز كۇش-جىگەر بەردى. قازاق ىرىمشىل حالىق قوي. الگى ءتۇس ماعان ايان بەرگەندەي كورىندى، جاقسىلىققا جورىدىم، سودان كەيىن استانانى اۋىستىرۋعا بەل بۋدىم، – دەدى نازاربايەۆ.