"دەمپارتيا" بەلسەندىلەرى 6 شىلدە كۇنى الماتىدا وتكەن ميتينگتە قامالعان 3 جاقتاسىنىڭ قايدا ۇستالىپ وتىرعانىن انىقتاۋعا تىرىسىپ ءجۇر.

كەشە بالۋان شولاق اتىنداعى سپورت سارايىنىڭ ماڭىندا دەموكراتيالىق پارتيا باستاماشىل توبى جانە ولاردىڭ جاقتاستارى ميتينگكە شىعىپ، 10 جارىم ساعات پوليسيا قورشاۋىندا بولعان. بەيبىت جيىن بارىسىندا بەلسەندىلەر پوليسيا ارنايى جاساعىمەن قاقتىعىسقا ءتۇسىپ، ابزال دوستياروۆ، تەمىرتاس ناعيمۋتۋللايەۆ، دانايا كالييەۆا، ىرىسبەك توقتاسىن ەسىمدى بەلسەندىلەر ءتۇرلى دەنە جاراقاتىن العان.

ارتىنشا ىرىسبەك توقتاسىن، داۋرەن دوستياروۆ، ءۋاليحان سۇلتانوۆ ەسىمدى ءۇش بەلسەندىنى پوليسيا ۇستاپ الىپ كەتكەن.

بەلسەندىلەر كەتلينگتەن بوساعان سوڭ تۇنگى ۋاقىتتا قامالعان جاقتاستارىن ىزدەي باستادى. بوستاندىق اۋداندىق پوليسيا باسقارماسى وكىلدەرىنىڭ ايتقاندارى بويىنشا قاسكەلەڭدەگى ۋاقىتشا قاماۋ يزولياتورىنا بارعانىندا ول جاقتاعىلار وزدەرىنە بەلسەندىلەردىڭ تۇسپەگەنىن ايتقان. الماتىداعى لوباچيەۆسكيي كوشەسىندە ورنالاسقان ۋاقىتشا قاماۋ يزولياتورىنداعىلار دا بەلسەندىلەرگە جاقتاستارىنىڭ تۇسپەگەنىن جەتكىزگەن.

بۇگىن، 7 شىلدەدە بەلسەندىلەر جاقتاستارىن ىزدەپ الماتى قالاسى پوليسيا دەپارتامەنتى عيماراتىنا باردى. ولارعا پوليسيا دەپارتامەنتىنىڭ وكىلى تورەحان يسين شىعىپ، ۇستالعان 3 ازامات اكىمشىلىك جازاعا تارتىلعانىن، داۋرەن دوستياروۆ قاراساي اۋداندىق پوليسيا باسقارماسىنا، ىرىسبەك توقتاسىن ەڭبەكشىقازاق اۋداندىق پوليسيا باسقارماسىنا جەتكىزىلگەنىن ءمالىم ەتتى. سوزىنشە، بەلسەندىلەر اليماتىداعى يزولياتورلاردا ورىن بولماعاندىقتان الماتى وبلىسى اۋداندارىنا جەتكىزىلگەن. پوليسيا وكىلى ءۇشىنشى ازامات ءۋاليحان سۇلتانوۆ دەنساۋلىق جاعدايىنا بايلانىستى اۋرۋحانادا جاتقانىن ءمالىم ەتتى.

بەلسەندىلەر جاقتاستارى قاتتى سوققىعا جىعىلىپ، پوليسيا ولاردى جاراقاتى جازىلسىن دەگەن ماقساتپەن قاماپ قويعان بولۋى مۇمكىن دەپ قاۋىپتەنەدى.

بەلسەندىلەر بۇگىن پوليسيا جاقتاستارىن كورسەتپەسە، ولاردىڭ اماندىعىنا كوز جەتكىزبەسە، ەرتەڭنەن باستاپ پوليسيا دەپارتامەنتى عيماراتى الدىندا اشتىق جاريالايتىنىن حابارلادى.