قازاقستاندا ەپيدەميولوگيالىق احۋال كۇردەلى بولىپ، ۆيرۋستى تاۋلىگىنە 5 مىڭنان استام ادام جۇقتىرىپ جاتقانىنا قاراماستان، قوعامدىق ورىندا ماسكا تاقپاي جۇرەتىندەر كوبەيگەن. مۇنى اركىم ءارتۇرلى تۇسىندىرەدى. ءبىرى اپتاپ ىستىقتا ماسكا تاققاندا تىنىس الۋدىڭ قيىندايتىنىن ايتسا، ەندى ءبىرى ماسكا ۆيرۋستان قورعامايدى دەگەنگە سەنەدى. وسى ورايدا قامشى ءتىلشىسى مەديسينالىق ماسكا ۆيرۋستى جۇقتىرىپ الۋدان قانشالىقتى قورعايتىنىن انىقتاۋعا تىرىستى.

كوپتەگەن عىلىمي دالەلدەر ماسكا تاعۋ كوروناۆيرۋستىڭ تارالۋ ءقاۋپىن ازايتۋعا كومەكتەسەتىنىنىن كورسەتەدى. اقش-تىڭ كانزاس شتاتىندا جۇرگىزىلگەن زەرتتەۋ ناتيجەسى بويىنشا بەتپەردە تاعۋدى مىندەتتەگەن ايماقتاردا ءولىم-جىتىم ەكى ەسەگە ازايعانى انىقتالعان.

الەمنىڭ ءار تۇكپىرىنەندەگى دەرەكتەرگە قاراپ، ماسكا اۋرۋدىڭ ازايۋىنا سەپتەسكەنىن بايقاۋعا بولادى. ءتۇرلى عىلىمي زەرتتەۋلەردىڭ ناتيجەلەرىنە جاسالعان شولۋ بويىنشا "ماسكا تاعۋ" قاراپايىم ازاماتتاردى كوۆيد-19-دان 60 پايىزعا، دەنساۋلىق ساقتاۋ قىزمەتكەرلەرىن 70 پايىزعا قورعاعان.

اقش-تىڭ اۋرۋلاردى باقىلاۋ جانە الدىن الۋ ورتالىعى جاريالاعان عىلىمي جازباداعى كەيبىر زەرتتەۋلەر ماسكا اعزاعا اۋىس ارقىلى ەنەتىن ۆيرۋس مولشەرىن ازايتا الادى دەگەن بولجام جاساعان. ولار ماسقا ۆيرۋستى ءسۇزىپ قالادى دەپ تۇجىرىمدايدى.

الايدا جالعىز ادامنىڭ ماسكا تاعىپ ءجۇرۋى ۆيرۋستان ادامدى جەتكىلىكتى تۇردە قورعامايدى. ماسكانى نەعۇرلىم كوپ ادام تاقسا، جەكە قورعانىس سوعۇرلىم جوعارى بولاتى دەيدى زەرتتەۋ اۆتورلاردى. سونداي-اق جۇعۋ دەڭگەيى نەگىزىنەن ۆيرۋستىڭ اۋادا قانشالىقتى ەكەنىنە بايلانىستى. ماسەلەن، پويىز ۆاگونىندا ۆيرۋس جۇقتىرعان بەس ادام مەن بەتپەردە تاققان ءبىر ساۋ ادام وتىرسا، وندا ءبىر ماسكا بەس ۆيرۋستىڭ جولىن بوگەيدى.

شەتەلدىك زەرتتەۋلەر ماسكا تاعۋ تۋرالى تالاپتىڭ الىنىپ تاستالۋى ۆيرۋستىڭ تارالۋ جىلدامدىعىنا اكەلىپ سوعۋ مۇمكىن ەكەنىن ايتادى.