پرەزيدەنت قاسىم-جومارت توقايەۆ ىشكى ىستەر ءمينيسترى ەرلان تۇرعىمبايەۆتى قابىلدادى. ول مەملەكەت باسشىسىنا ەلدەگى قازىرگى كريمينوگەندىك احۋال مەن ىشكى ىستەر ورگاندارى جۇمىسىنىڭ ناتيجەلەرى تۋرالى ايتتى. 

ءمينيستردىڭ مالىمەتىنشە، ۆەدومستۆو قىلمىستىڭ كوپتەگەن تۇرلەرىن اشۋ كورسەتكىشتەرىن جاقسارتقان. كىسى ءولتىرۋ، توناۋ، بۇزاقىلىق، ۇرلىق، سونداي-اق، كامەلەتتىك جاسقا تولماعاندار جاساعان قۇقىق بۇزۋشىلىقتار سانى ازايعان. قوعامدىق ورىندار مەن كوشەدەگى قاۋىپسىزدىك دەڭگەيى جوعارىلاعان. الايدا، ينتەرنەت جەلىسىن پايدالانۋ ارقىلى جاسالاتىن الاياقتىق قىلمىستار سانى ارتقان. بۇعان پاندەميا كەزىندەگى ونلاين-قىزمەتتەردىڭ ءوسۋى ىقپال ەتكەن.

تۇرعىمبايەۆ پرەزيدەنتكە ۆاكسينا العاندىعى جونىندە جالعان قۇجاتتار تاراتۋدىڭ جولىن كەسۋ بويىنشا قابىلدانىپ جاتقان شارالار تۋرالى ايتتى. جىل باسىنان بەرى پوليسيا ورگاندارى 50ء-ى جالعان ۆاكسيناسيا پاسپورتتارىن جانە 60-ى جالعان پتر-انىقتامالارىن جاساعانى ءۇشىن 110 قىلمىستىق ءىس قوزعاعان.

كەزدەسۋ قورىتىندىسى بويىنشا قاسىم-جومارت توقايەۆ مينيسترلىككە باسقا مەملەكەتتىك ورگاندارمەن بىرلەسىپ، كارانتين شارالارىن قامتاماسىز ەتۋگە ەرەكشە كوڭىل ءبولۋدى، سونداي-اق، كامەلەتكە تولماعاندارعا قارسى قىلمىستاردىڭ، تۇرمىس سالاسىنداعى قۇقىق بۇزۋشىلىقتاردىڭ الدىن الۋ جانە جول قاۋىپسىزدىگىن قامتاماسىز ەتۋ جونىندەگى جۇمىستى جانداندىرۋدى تاپسىردى.