ماڭعىستاۋ وبلىسى، بەينەۋ اۋدانىندا مەديسينا قىزمەتكەرلەرىنىڭ 100 پايىزى ۆاكسينا العان. بۇل تۋرالى قوعامدىق كوممۋنيكاسيا ورتالىعىندا وتكەن بريفينگىدە بەينەۋ اۋدانىنىڭ اكىمى بەينەۋبەك ءابىلوۆ ءمالىم ەتتى.

ونىڭ ايتۋىنشا، اۋداندا 10 ەگۋ پۋنكتى جۇمىس ىستەيدى. ونىڭ ىشىندە 3 جىلجىمالى ەگۋ پۋنكتى بار.

«بەينەۋ اۋدانى وبلىس ورتالىعىنان شالعاي ورنالاسقاندىقتان، اۋدانداعى ۆاكسيناسيا جۇمىستارى 1 اي كەشىگىپ باستالدى. العاشىندا ەكپەنى تاسىمالداۋ ماسەلەسى تۋىندادى. ماسەلەن، توڭازىتقىش جەتىسپەۋشىلىگى بولدى. وسىلايشا بەينەۋدە ەكپە ەگۋ جۇمىستارى 26 ناۋرىز كۇنى باستالدى. ۆاكسينانىڭ ءى كومپونەنتىن 7445 تۇرعىن السا، ءىى كومپونەنتپەن 4656 ادام ەگىلدى. ءقازىر بەينەۋ اۋىلىندا 4، سارعا اۋىلىندا 1، اقجىگىت اۋىلىندا 1 جانە بورانقۇل اۋىلىندا 1 ەگۋ پۋنكتتەرى جۇمىس ىستەپ تۇر»، - دەدى بەينەۋبەك ءابىلوۆ.

ايتا كەتەيىك، بەينەۋ اۋدانىندا مەديسينا قىزمەتكەرلەرىنىڭ 100 پايىزى (اۋداندا 600 مەديسينا قىزمەتكەرى بار، بارلىعى ەكپە الدى)، ءبىلىم بەرۋ سالاسى قىزمەتكەرلەرىنىڭ 60 پايىزى (اۋدانداعى 2664 قىزمەتكەردىڭ 1694ء-ى)، مەملەكەتتىك قىزمەتكەرلەردىڭ 92 پايىزى (اۋدانداعى 300 مەملەكەتتىك قىزمەتكەردىڭ 277ء-ى) ەكپە الدى.