ءبىلىم جانە عىلىم مينيسترلىگى 19 تالاپكەردىڭ ۇبت ناتيجەلەرى جويىلعانىن حابارلادى. ۇبت اياقتالعاننان كەيىن ۇلتتىق تەستىلەۋ ورتالىعىنىڭ قىزمەتكەرلەرى 145 مىڭ تالاپكەردىڭ بەينەجازبالارىن قاراعان.

بۇعان دەيىن ءبىلىم جانە عىلىم ءمينيسترى ۇبت-نى تاپسىرۋ ءراسىمىنىڭ اشىقتىعىن قامتاماسىز ەتۋدى جانە تەستىلەۋ ناتيجەلەرىن باقىلاۋدى كۇشەيتۋدى تاپسىرعان بولاتىن.

"وتكەن جىلى باقىلاۋ كامەرالارىنان بەينەجازبالاردى قاراۋ تۋرالى ەرەجە ەنگىزىلگەن بولاتىن. ۇبت اياقتالعاننان كەيىن 152 تالاپكەردىڭ تەستىلەۋ ەرەجەسىن بۇزعانى انىقتالىپ، ناتيجەلەرى جويىلدى. ولاردىڭ 91ء-ى ءبىلىم بەرۋ گرانتتىنان ايىرىلدى" دەلىنگەن مينيسترلىك تاراتقان حابارلامادا.

باقىلاۋدىڭ كۇشەيۋى 3 جىل ىشىندە تىيىم سالىنعان زاتتاردى كىرگىزۋ ارەكەتتەرى ءبىرشاما ازايعان. 2019 جىلى 128 مىڭ، 2020 جىلى 1296 تۇلەك ۇبت-عا تىيىم سالىنعان زاتتاردى الىپ وتۋگە تىرىسسا، بيىل 758 جاعداي تىركەلگەن. تەستىلەۋ كەزىندە تىيىم سالىنعان زاتتاردى پايدالانۋعا تىرىسقانداردىڭ سانى 2019 جىلعى 2363-تەن 2021 جىلى 749-عا دەيىن ازايعان.

الدىمەن، ۇلتتىق تەستىلەۋ ورتالىعىنىڭ قىزمەتكەرلەرى 100-دەن جوعارى بالل جيناعان تەستىلەنۋشىلەردىڭ بەينەجازبالارىن تەكسەرەدى. ماسەلەن، تالاپكەرلەردىڭ ناتيجەلەرى ناۋرىز جانە مامىر، ماۋسىم ايلارىنداعى كورسەتكىشتەرىنەن ايتارلىقتاي جوعارى بولۋى مۇمكىن.

بيىل ۇبت بەينەجازبالارىنىڭ ءبىر بولىگىن ەگجەي-تەگجەيلى قاراپ شىققاننان كەيىن، 19 تالاپكەردىڭ شپارگالكالاردى قولدانعانى جانە ەرەجەلەردى بۇزعانى انىقتالدى. وسىعان بايلانىستى ولاردىڭ ناتيجەلەرى جويىلعان.

– ءبىز تۇلەكتەرىمىزدىڭ تەك ءوز بىلىمىنە ءۇمىت ارتۋىن قامتاماسىز ەتۋ ءۇشىن وسىنداي مۇقيات تەكسەرۋ جۇرگىزىپ جاتىرمىز. ويتكەنى، بۇگىن تەست تاپسىرىپ، ەرەجەنى بۇزعان تالاپكەردىڭ ەرتەڭ پوليسيا قىزمەتكەرى، دارىگەر، ءمۇعالىم نەمەسە سۋديا رەتىندە ادال مامان بولاتىنىنا كەپىلدىك جوق. سوندىقتان كوميسسيا 19 تالاپكەردىڭ ناتيجەلەرىن جويۋعا شەشىم قابىلدادى. ەندى ولار ءبىلىم بەرۋ گرانتتارىن تاعايىنداۋ كونكۋرسىنا قاتىسا المايدى. ءبىراق بۇل جاعدايلار بالالار تاراپىنان بولعاندىعىن ەسكەرىپ، ولارعا جوعارى وقۋ ورىندارىندا اقىلى نەگىزدە وقۋ مۇمكىندىگى بەرىلەدى. جالپى، بارلىق تۇلەكتەر ۇبت-نى جىلىنا بىرنەشە رەت تاپسىرا الادى. بۇل تەستىلەۋگە دايىندالۋ بارىسىندا وقۋشىلاردىڭ كۇيزەلىسىن ازايتادى. ءبىز تاعى دا بارلىق تالاپكەرلەردى اكادەميالىق ادالدىققا شاقىرامىز. ۇبت-نىڭ بارىنشا اشىق جانە ادال ءوتۋى ءۇشىن بۇدان ءارى دە بارلىق جاعدايدى جاسايتىنىمىزدى ايتقىم كەلەدى. بەينەجازبالاردى تەكسەرۋدى جالعاستىرامىز. بۇزۋشىلىقتار انىقتالعان جاعدايدا ناتيجەلەر مەن ءتىپتى بەرىلگەن گرانتتاردىڭ دا كۇشى جويىلادى، – دەدى بعم ۇلتتىق تەستىلەۋ ورتالىعى ديرەكتورىنىڭ م.ا. ناۋجان ديداربەكوۆا.