اتىراۋداعى پسيحو-نيەۆرولوگيالىق اۋىتقۋلارى بار بالالارعا ارنالعان مەكتەپ-ينتەرناتتاعى بالالارعا قارسى جازالعان وزبىرلىق ارەكەت بويىنشا تەرگەۋ باستالدى. بۇل تۋرالى كتك ارناسى حابارلادى.

دىمكاس (مۇگەدەك – رەد) بالالارعا جاسالعان وزبىرلىقتى اتىراۋداعى پسيحو-نيەۆرولوگيا اۋىتقۋلار ورتالىعىنىڭ بۇرىنعى قىزمەتكەرى ۆيدەوعا تۇسىرگەن. ونىڭ ايتۋىنشا، №3 ارناۋلى الەۋمەتتىك ورتالىقتاعى سوراقىلىق مۇنىمەن بىتپەيدى. 

بۇل بەينەجازبا الەۋمەتتىك جەلىدە 2-3 كۇننەن بەرى قىزۋ تالقىلانعانىمەن، 8ء-شى ساۋىردە تۇسىرىلگەن. ۆيدەونىڭ اۆتورى – ۇلبيكە بەيسەكەنوۆا. ءوزى ورتالىقتا ءبىر جىلعا جۋىق ىستەگەن ەكەن. ول "وسى ارالىقتا مۇنداي سوراقىلىقتىڭ تالايىنا كۋا بولدىم" دەپ وتىر. سونداي-اق بۇرىنعى ارىپتەستەرىن بالالارعا بولىنگەن اقشانى ۇرلادى دەپ ايىپتايدى.

ۆيدەودان ۋنيتازدىڭ ەكى بۇيىرىندەگى ەكى تەمىرگە 2 بالانى تاس قىلىپ بايلاپ قويعانىن كورۋگە بولادى. الايدا بۇل ارەكەتتى كىم جاساعانى ازىرگە بەلگىسىز. ءدال سول كۇنى كەزەكشىلىكتە بولعان ەكى تاربيەشى كوروناۆيرۋس جۇقتىرىپ، ءقازىر ەم قابىلداپ جاتىر.

پوليسيا دەپارتامەنتى عيماراتتىڭ ىشىندەگى بەينەكامەرانىڭ بارلىعىن تەكسەرىپ، تەرگەۋ امالدارىن باستاپ كەتكەن. ينتەرنات باسشىسى مۇنى ۆيدەو اۆتورى ۇلبيكە بەيسەكەنوۆانىڭ جاساعان قاستاندىعى دەيدى. ايتۋىنشا، ول وسى جەردە قىزمەتتە جۇرگەندە ورتالىققا تيەسىلى تالاي مۇلىكتى جىمقىرعان.

ول جۇمىستان قۋىلىپ، امالى تاۋسىلعان سوڭ بەينەجازباداعى ارەكەتتەردى ءوزى ۇيىمداستىرۋى مۇمكىن دەپ كۇدىككە ءىلىنىپ وتىر. وقيعا بولعان كۇنى كەزەكشىلىك قىزمەتتى اتقارعان 2 تاربيەشى ءقازىر پوليسيانىڭ قاداعالاۋىندا. دەرتىنەن ايىعىپ شىققان سوڭ تەرگەۋگە الىنىپ، دەرەك بويىنشا ءىس قوزعالماق.