دەنساۋلىق ساقتاۋ ۆيسە-مينيسترى اجار عينيات مەكتەپتەردەگى سانيتارلىق-ەپيدەميولوگيالىق جاعدايدى مالىمدەدى.

– ءبىلىم جانە عىلىم مينيسترلىگى ءبىلىم بەرۋ ۇيىمدارىن 2021-2022 وقۋ جىلىن ءداستۇرلى شتاتتىق وقىتۋ رەجيمىنە كوشىرۋ تۋرالى شەشىم قابىلدادى. قازىرگى ۋاقىتتا اكىمدىكتەرمەن بىرىگىپ، سانيتارلىق-ەپيدەميولوگيالىق قىزمەتكەرلەرى مەكتەپتەردىڭ وقۋ جىلىنا دايىندىعىن تەكسەرۋدە. سونىڭ ىشىندە سانيتارلىق-ەپيدەميولوگيالىق تالاپقا ساي كەلۋى تەكسەرىلەدى.

بىرىنشىدەن، عيماراتتاردىڭ سانيتارلىق-ەپيدەميولوگيالىق جاعدايى باستى نازاردا. مەكتەپكە كەلگەندە بالالاردىڭ ارا قاشىقتىعىن ساقتاۋ تۋرالى ايقىن بەلگىلەردىڭ بار بولۋى جانە سانيتايزەرلەر (دەزينفەكسيالاۋ ءۇشىن)، مەكتەپكە كىرەر جولداعى وتكىزەتىن باقىلاۋ جۇمىستارى قالاي جۇرگىزىلەتىنى بويىنشا تەكسەرۋ جۇمىستارى باستالدى، –  دەدى ۆيسە-مينيستر.

ونىڭ ايتۋىنشا بۇگىندە 354 مەكتەپ وقۋ جىلىنا دايىن ەمەس. تەكسەرىس جۇمىستارى 25 تامىزعا دەيىن جۇرگىزىلەتىن بولادى.

– ءقازىر باس سانيتار دارىگەردىڭ قاۋلىسى ازىرلەنۋدە. وعان سايكەس، ەگەر سىنىپتا ءبىر بالا كوروناۆيرۋسپەن اۋىرسا، بارلىق سىنىپ بايلانىستا بولعاندىقتان كارانتينگە كەتەدى. بالالاردىڭ جاپپاي اۋىرىپ قالۋىنا جول بەرمەس ءۇشىن وسى قاۋلىدا مەكتەپتەرگە سانيتارلىق تالاپتار كۇشەيتىلۋدە، – دەپ ايتتى اجار عينيات.