شىمكەنتتە جۇمىسسىز ازاماتتاردى جۇمىسپەن قامتۋ شارالارىنا تارتۋ بەلسەندى جۇزەگە اسىرىلۋدا. «ەڭبەك» باعدارلاماسى شەڭبەرىندە ۋاقىتشا جۇمىسقا ورنالاسقان قالا جاستارىنىڭ ءبىرى – باتىرحان ءامىرحانوۆ.
ل.ن.گۋميلوۆ اتىنداعى ەۋرازيا ۇلتتىق ۋنيۆەرسيتەتىن «قازاقستان تاريحى» ماماندىعى بويىنشا ءتامامداعان جاس مامان ءبىراز ۋاقىت جۇمىسسىز جۇرگەن. 2021 جىلدىڭ باسىندا قالالىق جۇمىسپەن قامتۋ ورتالىعىندا «جۇمىسسىز» مارتەبەسىمەن تىركەلىپ، كوپ ۇزاماي شىمكەنت قالاسى اباي اۋدانىنىڭ اكىمى اپپاراتىنا «قوعامدىق كومەكشى» رەتىندە جىل سوڭىنا دەيىن ۋاقىتشا جۇمىسقا جولداندى.

باتىرحان ءامىرحانوۆ، باعدارلاما قاتىسۋشىسى

– جۇمىس ىزدەۋشى ازاماتتارعا مەملەكەت تاراپىنان ءتۇرلى باعىتتاعى باعدارلامالار ۇسىنىلىپ وتىر. ەڭبەك ەتكىسى كەلەتىن ادامعا قاي كەزدە بولسا دا جۇمىس تابىلادى. مەن دە سول ۇستانىمدى قولدايمىن. ۋاقىتشا بولسا دا جۇمىسقا ورنالاسىپ، تابىس تاۋىپ ءجۇرمىن.
بيىل قوعامدىق جۇمىسپەن 3 000-عا جۋىق ادام ءتۇرلى مەكەمەلەر مەن كاسىپورىندارعا جولداندى. قازىرگى ۋاقىتتا جوسپار ارتىعىمەن ورىندالىپ، ۋاقىتشا جۇمىسقا جولداما بەرۋ ازىرگە توقتاتىلعان.
ايتا كەتسەك، ۋاقىتشا جۇمىس ورنى بولىپ ەسەپتەلىنەتىن «قوعامدىق جۇمىس» الدىن-الا كاسىپتىك دايارلاۋدى تالاپ ەتپەيدى.