شىمكەنت قالاسىنىڭ اكىمى مۇرات ايتەنوۆ ونلاين رەجيمدە تۇرعىنداردى كەزەكتى رەت جەكە ماسەلەلەرى بويىنشا قابىلداپ، ساۋالدارىنا جاۋاپ بەردى. قابىلداۋدا 8 ازاماتتىڭ ماسەلەسىن تىڭدادى. تۇرعىندار نەگىزىنەن الەۋمەتتىك سالا، جەر، ينفراقۇرىلىم جانە باسپانا ماسەلەسىن كوتەردى.

قاراتاۋ اۋدانى، قايتپاس-1 شاعىناۋدانىنىڭ تۇرعىنى جانگەلدى وسپانوۆ قوعامدىق كولىك، اياق جول، ەلەكتر جارىعى، اسفالت توسەۋ ماسەلەلەرىن جەتكىزدى. قالا اكىمى قوعامدىق كولىكتى دامىتۋدىڭ كەشەندى سحەماسىنا سايكەس، قايتپاس-1 شاعىناۋدانىنا №4 باعىتتتىڭ سىزباسى بويىنشا 2021 جىلعى قىركۇيەك ايىنىڭ سوڭىنا №104 اۆتوبۋس ۇيىمداستىرىلاتىنىن مالىمدەدى.

قايتپاس-1 شاعىناۋدانى مادينا ايالداماسى بويىنداعى كوشەگە اسفالت توسەۋ جۇمىستارى بيىل 1 قازانعا دەيىن تولىق اياقتالاتىن بولادى. «وڭتۇستىك جارىق ترانزيت» ج ش س تاراپىنان 2021 جىلدىڭ سوڭىنا دەيىن ينۆەستيسيالىق باعدارلاما اياسىندا ەلەكتر جەلىلەرى جاڭارتىلادى. ناتيجەسىندە، شامامەن 230 ابونەنت ساپالى ەلەكتر قۋاتىمەن قامتىلادى.

ال، ءنۇرسات شاعىناۋدانىنىڭ تۇرعىنى نۇرجان ەدەنبايدىڭ ماسەلەسى بويىنشا №201 ءۇي ماڭىنان يرريگاسيالىق ارىق سالۋعا الداعى وتەتىن قالا بيۋدجەتىنىڭ كەزەكتى ناقتىلاۋىنا ۇسىنىس ەنگىزىلەدى. يرريگاسيالىق ارىق سالۋ ماقساتىندا سمەتالىق قۇجاتتامالار ازىرلەنگەن.

سونداي-اق، قاراتاۋ اۋدانىنىڭ تۇرعىنى دانيار سەيىتجانوۆ مۇمكىندىگى شەكتەۋلى بالالاردىڭ دەنساۋلىعى، ءبىلىم، الەۋمەتتىك كومەك ماسەلەلەرىن شەشەتىن «اردا» قوعامدىق قورىنىڭ جۇمىسى تۋرالى ۇسىنىسىن جەتكىزدى.

قالا اكىمى «قامقورلىق» قورى ارقىلى اۋتيستىك دياگنوزىمەن اۋىراتىن بالالارعا ورتالىق اشۋ ماسەلەسىن شەشۋ بويىنشا جاۋاپتى تۇلعالارعا 10 كۇن ۋاقىت بەردى. بۇل ماسەلەنى شەشۋ ءۇشىن قالا اكىمىنىڭ ءبىرىنشى ورىنباسارى شىڭعىس مۇقانعا تاپسىرما بەردى.

قىزىلجار ەلدىمەكەنىنىڭ تۇرعىنى ارمان باباتايەۆتى باسپانا ماسەلەسى قينايدى. ول 2015 جىلدان بەرى تۇرعىن ءۇي كەزەگىندە تۇرادى.
قالا اكىمى مەملەكەتتىك تۇرعىن ءۇي قورىنان تۇرعىن ءۇي بەلگىلەنگەن تارتىپپەن كەزەك ارقىلى بەرىلەتىنىن اتاپ ءوتتى. شىمكەنت قالاسىندا بويىنشا جەتىم جانە اتا-اناسىنىڭ قامقورلىعىنسىز قالعان بالالار ساناتى بويىنشا 60 ازاماتتىڭ پاتەرمەن قامتىلۋى جوسپارلانعان بولاتىن. ونىڭ ىشىندە 25 پاتەر پايدالانۋعا بەرىلدى. قالعان 35 پاتەر قۇرىلىس باسقارماسى تاراپىنان پايدالانۋعا تاپسىرىلۋىنا سايكەس، ازاماتتارعا بەرىلەتىن بولادى.

شاھار باسشىسى كەزەكتى قابىلداۋدا تۇرعىندار ماسەلەسىن شەشۋ ءۇشىن باسقارما باسشىلارىنا، اۋدان اكىمدەرىنە ءتيىستى تاپسىرمالار بەردى.