قاراتاۋ اۋدانىنا قاراستى اسار شاعىن اۋدانىن وپتيكالىق جەلى ارقىلى ساپالى ينتەرنەتپەن قامتۋ ءۇشىن شىمكەنت قالاسى اكىمدىگىمەن جەكە ينۆەستورلار تارتىلعان بولاتىن.

وسى جۇمىستاردىڭ ناتيجەسىندە «i-LinkNet» جاۋاپكەرشىلىگى شەكتەۋلى سەرىكتەستىگى تاراپىنان اسار شاعىن اۋدانىنا وپتيكا جەلىسى تولىق جۇرگىزىلدى. بۇل تۋرالى قالالىق سيفرلاندىرۋ باسقارماسى مالىمدەدى. مامانداردىڭ ايتۋىنشا، ونداعى 2000-عا جۋىق ۇيگە تالشىقتى وپتيكا جەلىسى، ياعني، جالپى سانى 200 شاقىرىمدى قامتيتىن ابونەنتتىك كابەل تارتىلعان.

ناتيجەسىندە، اتالعان شاعىناۋدانداعى 9 مىڭعا جۋىق تۇرعىندى ساپالى ينتەرنەتپەن قامتۋعا تولىق مۇمكىندىك بار. بۇگىندە، ءوتىنىش قالدىرعان 200-گە جۋىق ۇيگە ينتەرنەت جەلىسى قوسىلىپ، تۇرعىنداردان قوسىمشا وتىنىشتەر قابىلدانۋدا. ەگەردە تۇرعىندار تاراپىنان كەڭجولاقتى ينتەرنەت جەلىسىنە قوسىلۋعا ناقتى وتىنىمدەر بەرىلگەن جاعدايدا، «i-LinkNet» كومپانيا تاراپى شاعىن اۋداندى تولىققاندى تالشىقتى وپتيكا جەلىسىمەن (200 مبيت/سەك جىلدامدىعىنا دەيىن) قامتاماسىز ەتەتىن بولادى.

الداعى ۋاقىتتا، «i-LinkNet» كومپانياسى سامال-3 شاعىن اۋدانىن (100%) تالشىقتى وپتيكا جەلىسىمەن قامتۋ جۇمىستارىن جۇرگىزەتىن بولادى،- دەيدى باسقارما ماماندارى.