«مەن ءقاۋىپسىز جاعدايدامىن». شىمكەنت قالاسىندا كوۆيدكە قارسى ۆاكسينا سالدىرعان قالا تۇرعىندارىنا جاس ەرىكتىلەر وسىنداي جازۋمەن بىلەزىك سىيعا تارتتى. مۇنداي ەرەكشە ءىس-شارا ءبىر مەزەتتە قالاداعى ءۇش ەمحانادا ۇيىمداستىرىلدى.

قالا دەڭگەيىندە وتكەن ءىس-شارا بارىسىندا ەرىكتىلەر 200 ازاماتقا وسىنداي بىلەزىك تاراتىپ بەردى. ۇيىمداستىرۋشىلار وسىلايشا ەكپە العان تۇرعىنداردىڭ قوعامعا ءقاۋىپسىز ەكەنىن كوپشىلىككە تۇسىندىرگىسى كەلدى.

– ۆاكسينا سالدىرعان سوڭ 7 كۇننەن كەيىن يممۋنيتەت پايدا بولادى. اۋرۋ جۇقتىرعاننىڭ وزىندە ۆاكسينا سالدىرعان ادام ونى جەڭىل وتكىزەدى. مۋتاسياعا ۇشىراعان كوروناۆيرۋس اسا ءقاۋىپتى، ايتسە دە ۆاكسينانىڭ كۇشى ۆيرۋستىڭ اسەرىن ازايتادى. كوروناۆيرۋسقا قارسى ۆاكسينا قابىلداۋ – ءومىرىڭدى ساقتايدى، – دەيدى ءىس-شاراعا قاتىسقان دارىگەر-ينفەكسيونيست جانايىم پولات.

ايتا كەتەيىك، ەگۋ ناۋقانى باستالعالى بەرى قالادا 521 078 ادام ۆاكسينا الدى. ونىڭ ىشىندە 420 725 ادام ۆاكسينانىڭ ەكى كومپونەنتىن الدى. قازىرگى تاڭدا قالادا ەپيدەميولوگيالىق جاعداي تۇراقتالىپ كەلەدى. دەگەنمەن، مەديسينا ماماندارى بوساڭسۋعا بولمايتىنىن ەسكەرتۋدە. بارىنشا ساقتىق شارالارىن ساقتاپ، كارانتين رەجيمىن قاتاڭ ۇستانۋعا شاقىرادى.