بۇگىن قحا ءتوراعاسىنىڭ ورىنباسارى، ق ر پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ شىمكەنتتە قالالىق ەتنومادەني بىرلەستىكتەردىڭ توراعالارىمەن جانە اسسامبلەيا جانىنداعى قوعامدىق قۇرىلىمداردىڭ جەتەكشىلەرىمەن كەزدەستى.

قازاقستان حالقى اسسامبلەياسىنىڭ ءححىح سەسسياسىندا بەرىلگەن تاپسىرمالاردى ساپالى جۇزەگە اسىرۋ بارىسى تالقىلانعان جيىندا قالالىق قحا جانىنداعى قوعامدىق كەلىسىم كەڭەسىنىڭ ءتوراعاسى ورىنباي راحمانبەردييەۆ، قالالىق قحا ءتوراعاسىنىڭ ورىنباسارى، قالالىق كورەي ەتنومادەني بىرلەستىگىنىڭ ءتورايىمى روزا پاك، قالالىق وزبەك ەتنومادەني بىرلەستىگى جاستار قاناتىنىڭ مۇشەسى حۋرماتوي ابدۋحاميدوۆا ءسوز سويلەپ، ۇسىنىس-پىكىرلەرىن ايتتى.

بيىل قحا قىزمەت باعىتى بويىنشا شىمكەنتتە 186 ءىس-شارا ۇيىمداستىرىلىپ، قوعامدىق كەلىسىم كەڭەستەرىمەن 19 ماسەلە قارالدى. انالار كەڭەستەرىنىڭ باستاماسىمەن 5 جوبا ىسكە استى. اسسامبلەيانىڭ مەدياتيۆتىك الاڭدارىندا 53 داۋلى ماسەلە وڭ شەشىلدى.
اسسامبلەيا جانىنداعى اقپاراتتىق ءتۇسىندىرۋ توبى ەتنوس وكىلدەرى كوپتەپ شوعىرلانعان 23 شاعىن اۋدان مەن تۇرعىن الاپتا 138 ماقساتتى كەزدەسۋ وتكىزدى.

كەزدەسۋدە ق ر پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ: «كەز كەلگەن مەملەكەت ءۇشىن قوعامدىق كەلىسىمنىڭ ماڭىزدىلىعى ەرەكشە. تاۋەلسىزدىگىمىزدىڭ 30 جىلدىعى ىشىندە قازاقستاندىقتاردىڭ بىرلىگى مەن تۇتاستىعىنىڭ ارقاسىندا بۇگىنگى جەتىستىكتەرگە قول جەتكىزدىك. تاتۋلىعىمىزبەن تاۋەلسىزدىك تابىستارىن ودان ءارى ەسەلەي تۇسۋگە، ەلىمىزدە بارشاعا قولايلى ورتا قالىپتاستىرۋعا اسسامبلەيا مۇشەلەرى الداعى ۋاقىتتا دا جۇمىلا جۇمىس جۇرگىزەدى دەپ سەنىم بىلدىرەمىن» – دەدى.

اسسامبلەيا مۇشەلەرىنىڭ ۇسىنىس-پىكىرلەرىن تىڭداپ، پىكىر الماسقاننان كەيىن قحا ءتوراعاسىنىڭ ورىنباسارى مەملەكەتتىك ساياسات اياسىندا بىرلىك پەن تاتۋلىقتى نىعايتۋدا بەلسەندى قىزمەت جاساپ جۇرگەن ءبىرقاتار ازاماتتارعا العىس حات تابىستادى.