قازاقستان حالقى اسسامبلەياسى ءتوراعاسىنىڭ ورىنباسارى، ق ر پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ شىمكەنت قالاسىنداعى وزبەك دراما تەاترىندا وزبەك ەتنومادەني بىرلەستىگىنىڭ مۇشەلەرىمەن كەزدەستى. باسقوسۋدا وزبەك ەتنوسىنىڭ وكىلدەرى تىعىز شوعىرلانعان سايرام تۇرعىن الابىنداعى دوستىق پەن ىنتىماقتاستىقتى ودان ءارى نىعايتۋ، جانە ىشكى تۇراقتىلىقتىڭ ماڭىزدىلىعى ايتىلدى.
بۇگىندە شىمكەنت قالاسى تۇرعىندارىنىڭ 17،5%-ىن وزبەك ەتنوسىنىڭ وكىلدەرى قۇرايدى. شاھارداعى وزبەكتەردىڭ باسىم بولىگى سايرام تۇرعىن الابىندا قونىستانعان. قالادا 4 مەكتەپتە وزبەك تىلىندە ءبىلىم بەرىلسە، 32 ارالاس مەكتەپتە وزبەك سىنىپتارى بار.
كەزدەسۋدە قازاقستانداعى وزبەك ەتنومادەني بىرلەستىكتەرى «دۋستليك» قاۋىمداستىعىنىڭ ءتوراعاسى يكرام حاشيمجانوۆ وڭىرىمىزدەگى بىرلىك پەن تاتۋلىقتى نىعايتۋ باعىتىندا اتقارىلىپ جاتقان جۇمىستار تۋرالى باياندادى.
جيىن سوڭىندا قازاقستان حالقى اسسامبلەياسى ءتوراعاسىنىڭ ورىنباسارى مارات ءازىلحانوۆ قاۋىمداستىق ءتوراعاسىنا وزبەك ەتنومادەني بىرلەستىگىنىڭ جۇمىسىن جانداندىرۋعا قاتىستى ءبىرقاتار مىندەتتەر جۇكتەپ، بىرلىك قاعيداتتارىن شوعىرلاندىرۋعا باعىتتالعان ارنايى جوبالار ازىرلەپ، ەنگىزۋدى تاپسىردى.
