شىمكەنت قالاسىندا بۇگىن №104، №60 جانە №75 اۆتوبۋس باعىتتارى ىسكە قوسىلدى. بۇل جوسپارلى كەشەندى سحەماسىنا سايكەس جانە قالا حالقىنىڭ سۇرانىسى بويىنشا جۇزەگە اسىرىلىپ وتىر،- دەپ حابارلادى قالالىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ەرجان جولداسوۆ @akimat_shymkent ينستاگرام پاراقشاسىندا وتكەن تىكەلەي̆ ەفير بارىسىندا.

قالا تۇرعىندارى تاراپىنان كوپ كوتەرىلەتىن ساۋالداردىڭ ءبىرى قوعامدىق كولىك ماسەلەسى ەكەنىن ايتقان سالا جەتەكشىسى تۇرعىندار سۇرانىسى بويىنشا جىل باسىنان بەرى 15 مارشرۋت جاڭادان قوسىلىپ، 30-عا جۋىق اۆتوبۋستىڭ باعىتىنا وزگەرىستەر ەنگىزىلگەنىن اتاپ ءوتتى.

ەفير بارىسىندا ەرجان جولداسوۆ بۇگىن جۇمىسى ۇيىمداستىرىلعان 3 اۆتوبۋستىڭ ءجۇرى باعىتتارىنا توقتالىپ ءوتتى.

ونىڭ ايتۋىنشا، №104 باعىت «قايتپاس-1 ش/ا - وڭتۇستىك ش/ا» ارالىعىنا دەيىن قاتىنايتىن بولادى. وندا قىزمەت كورسەتەتىن اۆتوبۋس سانى 8، دەمالىس كۇندەرى 6 اۆتوبۋس. ارالىق ينتەرۆالى 18 مين، دەمالىس كۇندەرى -24 مينۋتتى قۇرايدى. ال، №60 باعىت قازعۇرت شاعىن اۋدانىنان تەمىر جول ۆوكزالى ايالداماسىنا دەيىن كەلەدى. اۆتوبۋستاردىڭ قاتىناۋ ارالىعى 15 مينۋت.

ىسكە قوسىلعان ءۇشىنشى باعىت №75. بۇل تۇران شاعىن اۋدانىنان 11ء-شى شاعىن اۋدانىنداعى ايالداماسىنا دەيىن كەلەدى. اتالمىش مارشرۋت بويىنشا اۆتوبۋس سانى 6، دەمالىس كۇندەرى 4. ارالىق ينتەرۆالى 20-25 مينۋتتى قۇرايدى.

سونىمەن قاتار، بۇگىن №9، 21، 56، 68 باعىتتاردىڭ قوزعالىس سىزباسى قايتا ۇيىمداستىرىلدى. اتاپ ايتقاندا شىمسيتي شاعىناۋدانىنا قىزمەت كورسەتەتىن №9 باعىت «اۆتونۇر» بازارىنان وقمۋ ارالىعىنا دەيىن ۇزارتىلدى. قۇرساي ش/ا قاتىنايتىن №21 مارشرۋت «راحيما» پلازا ايالداماسىنان «قاجىمۇقان» ستاديونىنا دەيىن قىسقاردى. نۇرتاس ش/ا قىزمەت كورسەتەتىن 56 مارشرۋت «قىرعى» بازارىنا دەيىن سوزىلسا، كۇنشىعىس شاعىن اۋدانىنىڭ پازيكوۆ كوشەسىنەن قاتىنايتىن №68 مارشرۋت قازىرگى ۋاقىتتا ب.مومىش ۇلى جانە تۇركىستان كوشەسىنە تۇسپەي، تاۋكە حان داڭعىلىمەن بەيبىتشىلىك كوشەسى ارقىلى تەمىرلان تاس جولىنا تۇسەدى.