سەمەي قالاسىندا وقۋ پروسەسىنە كەدەرگى كەلتىرىپ، مۇعالىمدەردى كوشە سىپىرۋعا جىبەرگەن وقيعاعا قاتىستى ءبىلىم ءمينيسترى اسحات ايماعامبەتوۆ پىكىر ءبىلدىردى. بۇل تۋرالى مينيستر Facebook پاراقشاسىندا مالىمدەدى.
– سەمەي قالاسىندا وقۋ پروسەسىنە كەدەرگى كەلتىرىپ، مۇعالىمدەردى كوشە سىپىرۋعا جىبەرگەن. شاماسى، مۇنداي تاپسىرمانى قالا اكىمىنىڭ ورىنباسارى بەرىپ، وسىنداي مازمۇنداعى حات مەكتەپتەرگە تاراتىلعان. 2019 جىلدىڭ جەلتوقسانىندا قابىلدانعان زاڭ شەڭبەرىندە پەداگوگتەردى وزىنە قاتىستى ەمەس قىزمەتتەرگە تارتۋعا تىيىم سالىنادى. سودان بەرى مۇعالىمدەر تەك تىكەلەي فۋنكسيونالدىق مىندەتتەرمەن اينالىسۋى كەرەك ەكەنىن ءتۇسىنۋ ءۇشىن ۋاقىت جەتكىلىكتى بولدى، – دەدى مينيستر.
ول وسىنداي ارەكەت ءۇشىن تارتىپتىك جانە اكىمشىلىك جاۋاپكەرشىلىككە تارتۋدان باستاپ جۇمىستان شىعارۋعا دەيىن 200-گە جۋىق باسشى جازالانعانىن ەسكە سالدى.
– سەمەي قالاسىنداعى وقيعاعا بايلانىستى ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتى اكىمشىلىك ءىس قوزعاپ، تەكسەرۋ جۇرگىزىپ جاتىر. قالا اكىمى ورىنباسارىنىڭ وسى جاعدايعا قاتىسى راستالسا، بۇل لاۋازىمدى تۇلعا جانە وزگە تۇلعالار اكىمشىلىك جاۋاپكەرشىلىككە تارتىلادى. سونداي-اق، قاجەت شارالار قابىلداۋ ءۇشىن مەملەكەتتىك قىزمەت ىستەرى اگەنتتىگىنە جۇگىنەمىز. سونىمەن قاتار، قالالىق ءبىلىم ءبولىمى باسشىسى دا جاۋاپكەرشىلىككە تارتىلادى، – دەدى مينيستر.
بۇعان دەيىن سەمەي تۇرعىنى مەكتەپ مۇعالىمدەرى ساباق وتكىزۋدىڭ ورنىنا سەنبىلىكتە كوشە تازالاپ جاتقان سۋرەتتەر جاريالاعان بولاتىن.
