شىمكەنت قالاسىنىڭ اكىمى مۇرات ايتەنوۆ «اقتاس» شاعىناۋدانىنداعى سۋ جانە گاز جۇيەلەرىنىڭ قۇرىلىس بارىسىن ارالاپ كوردى.

اقتاس-2 شاعىناۋدانىن ساپالى اۋىز سۋمەن قامتۋ ماقساتىندا مەردىگەر مەكەمە «التىن كونستراكشەن» ءجشس-ى تاراپىنان قۇرىلىس جۇمىستارى اتقارىلۋدا. بيىل شىلدە ايىندا باستالعان قۇرىلىس جۇمىستارىن قاراشا ايىندا اياقتاۋ جوسپاردا.

جالپى ۇزىندىعى 50،9 شاقىرىم سۋاققىنىڭ 43،0 شاقىرىمنان استامى سالىنىپ، قۇرىلىس جۇمىستارى وندىرىستىك كەستەگە سايكەس جۇرگىزىلۋدە. جالپى جۇمىستىڭ (ءىى كوتەرۋ سورعى ستانساسىن ورناتۋ، ءورت ءسوندىرۋ گيدرانتتارىن جانە ىسىرما (زادۆيجكا) ورناتۋ) 95 %-ى ورىندالدى. قۇرىلىس تولىق اياقتالعاننان كەيىن تۇراقتى تۇردە ساپالى اۋىز سۋ بەرىلەتىن بولادى.

قالا اكىمى ابونەنتتەۋ جۇمىستارىن جۇيەلى ۇيىمداستىرىپ، تۇرعىندارعا بۇل باعىتتاعى جۇمىستاردى ءتۇسىندىرۋ بويىنشا تاپسىرما بەردى.

سونداي-اق، شاعىناۋداندى تابيعي گازبەن قامتۋ بويىنشا مەردىگەر مەكەمە «رەمستروي» ءجشس-ى تاراپىنان قۇرىلىس جۇمىستارى بيىل قازان ايىندا باستالادى.

جوبانىڭ جالپى قۇنى– 536 ملن تەڭگە. گاز قۇبىرىنىڭ ۇزىندىعى – 17 شاقىرىم. قۇرىلىس جۇمىستارى 2022 جىلعا وتپەلى.