شىمكەنتتە بيىل ەلىمىزدىڭ 30 جىلدىق تاۋەلسىزدىگى قارساڭىندا سايرام كومەكشى مەكتەپ-ينتەرناتى «سايرام كومەكشى مەكتەپ-ينتەرنات-كوللەدجى ارنايى كەشەنى» مارتەبەسىنە يە بولدى.

مەكتەپ-ينتەرناتى عيماراتىنىڭ نەگىزى 1916 جىلى قالانعان. 1935 جىلى بالالار ءۇيى، 1975 جىلى«سايرام كومەكشى مەكتەپ-ينتەرناتى» بولىپ وزگەردى.

مەكەمە ارنايى وقىتۋدى قاجەت ەتەتىن بالالاردىڭ پسيحوفيزيكالىق كەمشىلىگىن تۇزەتۋ،  فۋنكسيونالدىق ساۋاتتىلىعىنىن ارتتىرىپ، ەڭبەككە باۋلۋ جانە قوعامدىق ومىرگە بەيىمدەپ كەلۋدە.

بۇگىندە بۇرىنعى مەكتەپ-ينتەرناتتىڭ ورنىنا جاڭا ۇلگىدەگى عيمارات سالىنىپ، 267 بالا تاربيە مەن ءبىلىم الۋدا. ءبىلىم بەرۋ كەشەنى جاتاقحانا، وقۋعيماراتى، اكت پەن سپورت زالدارى، مەديسينالىق بەكەت جانە اسحانامەن قامتىلعان.

كەشەننىڭ 36 سىنىپتىق بولمەلەرى  زاماناۋي وقۋ قۇرىلعىلارىمەن جابدىقتالعان. زاماناۋي ۇلگىدە بوي كوتەرگەن عيماراتتا  تىگىنشىلىك، اعاش وڭدەۋ، اسپازدىق كاسىپتى ۇيرەتۋگە ارنالعان شەبەرحانا بولمەلەرى، ارنايى كۇتىمدى قاجەت ەتەتىن بالالارعا ارنالعان كوررەكسيالىق وقۋ، سەنسورلىق ءبىلىم الۋ، پسيحولوگ، لوگوپەد مامانداردىڭ سىنىپ بولمەلەرى ارنايى جابدىقتالىپ، جازعى سپورت الاڭى سالىنعان.

مەكەمەدە وقۋ ساباقتارى مەملەكەتتىك تىلدە  جۇرگىزىلەدى. ولارعا كاسىپتىك ماماندىقتار بويىنشا ديپلوم بەرىلەدى. قوسىمشا ءبىلىم بەرۋ ءۇشىن قولونەر جانە دەنە شىنىقتىرۋ  ۇيىرمەلەرى دە جۇمىس جۇرگىزەدى.

شىمكەنت قالاسى اكىمدىگىنىڭ باسپا ءسوز قىزمەتى