قالاداعى №1 اۋرۋحانا بازاسىندا دارىگەرلەر ينسۋلت العان 69 جاستاعى ناۋقاستىڭ مي قان تامىرىن ميحروحيررۋگيالىق ادىسپەن تىگىپ بەردى. شىمكەنتتە العاش رەت جاسالعان وتانى ەلىمىزدىڭ ۇزدىك نەيروحيرۋرگى ەركىن مەدەتوۆ جاسادى.

ناۋقاس اتالعان ارۋرۋحاناعا جەدەل جاردەم قىزمەتىمەن جەتكىزىلگەن. ينسۋلت العان ناۋقاستى دارىگەرلەر انگيوگرافيالىق ادىسپەن تەكسەرىپ، قان تامىرىنداعى اقاۋدى انىقتاعان. پاسيەنتتىڭ ءومىرىن امان الىپ قالۋ ءۇشىن دارىگەرلەر شۇعىل تۇردە ونى وتا زالىنا كىرگىزىپ، مي قانتامىرانا حيرۋرگيالىق ەم جاسادى.

–تەكسەرۋ كەزىندە ناۋقاستىڭ شات تامىرى ارقىلى ەنىپ، مي قان تامىرلارىن تەكسەردىك. تەكسەرۋدىڭ ناتيجەسىندە مي قان تامىرىنىڭ بىتەلگەنىن انىقتادىق. ميدىڭ سول ايماعىنا قاننىڭ جەتىسپەۋشىلىگىنە بايلانىستى جاڭادان تامىر تىگۋ قاجەت بولدى. سوندىقتان وسى وپەراسيانى جاسادىق. بۇل وتانىڭ ماقساتى ميدىڭ قان جەتپەي تۇرعان ايماعىنا اينالما جول ارقىلى قان جەتكىزۋ،-دەيدى نەيروحيرۋرگ ەركىن جۇماعالي ۇلى.

ناۋقاس ءقازىر ءوزىنىڭ جاعدايى جاقسى ەكەنىن، دارىگەرلەرگە، وسىنداي ۇلكەن مۇمكىندىك بەرگەن مەملەكەتتىك قولداۋعا العىسىن ايتىپ وتىر.

«اكەم ءۇشىن قاتتى ۋايىمدادىق. مۇنداي وپەراسيا قالامىزدا جاسالاتىنىن بىلمەدىك. اكەمنىڭ جاعدايى ءقازىر جاقسى. دارىگەرلەرگە تاعى دا راقمەت» دەيدى ناۋقاستىڭ ۇلى قايرات اكەنوۆ.

ايتا كەتۋ كەرەك، مۇنداي وپەراسيا 10 مىڭ دوللارعا باعالانادى. الايدا مىندەتتى الەۋمەتتىك مەديسينالىق ساقتاندىرۋ كەزىندە قالانىڭ مەديسينالىق مەكەمەلەرىندە حيرۋرگيالىق ەمدەۋ تەگىن كورسەتىلەدى.

مەملەكەت باسشىسىنىڭ تاپسىرماسى اياسىندا جوعارى بىلىكتى مەديسينالىق كومەكتى دامىتۋعا ەرەكشە كوڭىل بولىنەدى. دەنساۋلىق ساقتاۋ سالاسىنداعى مەملەكەتتىك ساياساتتى جۇزەگە اسىرۋدا بيىل ەكى ينسۋلت ورتالىعى اشىلدى. بۇدان باسقا، قالالىق بيۋدجەتتەن مەديسينالىق مەكەمەلەردىڭ ماتەريالدىق-تەحنيكالىق بازاسىن جاراقتاندىرۋعا 6،5 ملرد.تەڭگە ءبولىندى.

شىمكەنتتەگى ينسۋلتپەن اۋىراتىن ناۋقاستاردى ەمدەۋگە جاتقىزۋدى تالداۋ كەزىندە پاسيەنتتەردىڭ تەك 7% عانا ءوزىن-وزى ەمدەۋ ارقىلى ستاسيونارعا تۇسەتىنى جانە جەدەل مەديسينالىق كومەك جەلىسى بويىنشا 87% ، پاسيەنتتەردىڭ 5% ەمحانالار جەلىسى بويىنشا تۇسەتىنى جانە قالعان 1% باسقالاي جولمەن ستاسيونارعا تۇسەتىنى انىقتالدى. سوندىقتان دارىگەرلەر اۋرۋدى ءورشىتىپ الماۋ ءۇشىن ەمحانالارعا ۋاقىتىندا بارىپ، ەم قابىلداۋ كەرەك ەكەنىن ەسكەرتەدى.