ەرتەڭ، 17 اقپان كۇنى ساعات 20:30-دا "QAZAQSTAN" ۇلتتىق تەلەارناسىنان پرەزيدەنت قاسىم-جومارت توقايەۆتىڭ سۇحباتى كورسەتىلەدى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي حابارلادى.
"پرەزيدەنت سۇحبات بارىسىندا قاسىرەتتى قاڭتار وقيعاسىنىڭ سەبەپ-سالدارى مەن الداعى ۋاقىتتا جۇزەگە اسىرىلاتىن ساياسي جانە الەۋمەتتىك رەفورمالار، قازاقستاننىڭ سىرتقى ساياساتتاعى ستراتەگيالىق سەرىكتەستەرىمەن قارىم-قاتىناستارىنا، قابىلداعان شەشىمدەرىنە قاتىستى ساۋالدارعا جاۋاپ بەرەدى" دەلىنگەن اقپاراتتىق حابارلامادا.
پرەزيدەنتتىڭ جۋىردا عانا "حابار" جانە "حابار 24" تەلەارنالارىنان سۇحباتى كورسەتىلگەن. ول جەردە سۇحبات تەك ورىس تىلىندە جۇرەدى. بۇل كوپتەگەن الەۋمەتتىك جەلى قولدانۋشىلارىنىڭ نارازىلىعىن تۋدىرعان بولاتىن. سول كەزدە پرەزيدەنتتىڭ باسپا ءسوز حاتشىسى پرەزيدەنت نەگە مەملەكەتتىك ەمەس، ورىس تىلىندە سۇحبات بەرەدى دەگەن ساۋالعا جاۋاپ بەرىپ، سۇحبات الەمدىك اۋديتورياعا ارنالعانىن، سوندىقتان سۇحباتتىڭ مەيلىنشە كەڭ تارالۋى كوزدەلگەنىن ايتقان. ونىڭ بۇل سوزدەرى ءقازاقتىلدى ورتادا ودان سايىن نارازىلىق تۋدىرىپ، قىزۋ تالقىلانعان.
بەرىك ءۋالي سول مالىمدەمەسىندە وتاندىق باق-قا بەرىلەتىن كەلەسى كولەمدى سۇحبات مىندەتتى تۇردە قازاق تىلىندە بولادى دەگەن ەدى.
پىكىر قالدىرۋ