ىشكى ىستەر مينيسترلىگى قازاقستاننىڭ ءبىرقاتار قالاسىندا جارىلعىش زاتتار قويىلعانى تۋرالى حابارلامالار كەلىپ تۇسكەنىن ءمالىم ەتتى.
"قازاقستاننىڭ ءبىرقاتار قالاسىندا ءتۇرلى وبەكتىلەرىندە ورناتىلعان جارىلعىش قۇرىلعىلار تۋرالى كەلىپ تۇسكەن حابارلامالارعا بايلانىستى كەلۋشىلەر مەن پەرسونالدى ەۆاكۋاسيالاۋ، عيماراتتاردى قورشاۋ جۇرگىزىلدى، ارنايى تەحنيكا مەن قىزمەتتىك-ىزدەستىرۋ يتتەرىن قولدانا وتىرىپ، ءتيىستى قىزمەتتەر مەن مامانداردىڭ وبەكتىلەردى تەكسەرۋى قامتاماسىز ەتىلدى" دەپ حابارلاعان مينيسترلىك بىردە-بىر دەرەك راستالماعانىن، اتالعان فاكتىلەر بويىنشا ق ر قىلمىستىق كودەكسىنىڭ 273-بابى بويىنشا سوتقا دەيىنگى تەرگەۋ باستالعانىن جەتكىزدى.
اتالعان باپ بويىنشا 5 جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
"ىشكى ىستەر مينيسترلىگى سالىنعان جارىلعىش زات تۋرالى كورىنەۋ جالعان اقپارات تاراتۋ قىلمىستىق جاۋاپتىلىققا اكەپ سوعاتىنىن ەسكەرتەدى. تۇرعىنداردى سابىرلىق ساقتاۋعا، وتكىزىلەتىن ءىس-شارالارعا جانە قابىلداناتىن قاۋىپسىزدىك شارالارىنا تۇسىنىستىكپەن قاراۋعا جانە تەك رەسمي اقپاراتقا سەنۋگە شاقىرامىز" دەلىنگەن اقپاراتتىق حابارلامادا.
102 نومەرىنە قاراعاندىدا مامانداندىرىلعان حالىققا قىزمەت كورسەتۋ ورتالىعىنا، ەلوردادا "My car" جانە "Lexus" اۆتوسالوندارىنا، "حان-شاتىر" مەن "Mega Silk Way ساۋدا ويىن-ساۋىق ورتالىقتارىنا مينا قويىلعانى تۋرالى اقپارات تۇسكەن. ءىىم اقپاراتتى تەكسەرىپ، شاقىرۋ جالعان بولعانىن انىقتاعان. قازىرگى ۋاقىتتا قاراعاندىدا جالعان شاقىرۋ جاسادى دەلىنگەن كۇتىكتى ۇستالعانى حابارلاندى.
پىكىر قالدىرۋ