پۋتين بەيسەنبى كۇنى قول قويعان جارلىقتان كەيىن ەۋروپا پايدالاناتىن گازدىڭ ۇشتەن ءبىرىن جوعالتىپ الۋ ءقاۋپى الدىندا تۇر. رەسەي گازىنا قاتتى تاۋەلدى گەرمانيا ءقازىردىڭ وزىندە توتەنشە جاعداي قاۋپىنە قامدانىپ، ارەكەتتەر جوسپارىن ىسكە قوستى. بۇل تۋرالى جالپىەۋروپالىق Euractiv.com مەديا جەلىسى حابارلادى.
رەسەي پرەزيدەنتى ۆلاديمير پۋتين "جۇمادان باستاپ شەتەلدىك ساتىپ الۋشىلار رەسەي گازىن رۋبلمەن ساتىپ الۋى كەرەك بولماسا جەتكىزۋ توقتاتىلادى" دەگەن تالاپ قويعان. پۋتين ساتىپ الۋشىلار گازپرومبانكتەن رۋبلمەن ەسەپشوتتار اشۋعا ءتيىس، وسى شوتتار ارقىلى جەتكىزىلگەن گازعا تولەم جاسالادى دەپ مالىمدەدى.
ەۋروپالىق كاپيتال بۇل قادامدى "بوپسالاۋ" ارەكەتى دەپ باعالادى.
ەنەرگورەسۋرس ەكسپورتى – رەسەيدىڭ ۋكرايناعا باسىپ كىرۋىنە بايلانىستى رەسەيلىك بانكتەرگە، بيزنەسمەندەر مەن پۋتين جاقتاستارىنا سالىنعان باتىس سانكسيالارىنا قارسى ءپۋتيننىڭ ەڭ قۋاتتى ىقپال ەتۋ تەتىكتەرىنىڭ ءبىرى.
ەۋروكوميسسيا پرەزيدەنتى ۋرسۋلا فون دەر ليايە سانكسيالاردى اينالىپ وتۋگە جول بەرىلمەيتىنىن، "ەنەرگيانى بوسپالاۋ ءۇشىن قولداناتىن ۋاقىت ءوتتى" دەگەندى ايتتى.
گەرمانيا كانسلەرى ولاف شولس بەيسەنبىدە باتىس ەلدەرى رەسەي گازىن ەۋرومەن نەمەسە دوللارمەن ساتىپ الۋدى جالعاستىرا بەرەتىنىن ءمالىم ەتتى.
گەرمانيانىڭ ەنەرگەتيكالىق كومپانيالارى جەتكىزۋدە كىردىرىس بولسا نەمەسە رەسەي گاز جەتكىزۋدى توقتاتسا، قالاي ارەكەت ەتۋ جونىندە بەرلينمەن تىعىز كەلىسسوز جۇرگىزىپ جاتقانى بەلگىلى بولدى.
قازىرگى تاڭدا ەۋروپا ەلدەرى بالاما جولداردى ىزدەپ جاتىر، الايدا ول شەكتەۋلى بولىپ تۇر. اقش ءوزىنىڭ سۇيىتىلعان وتىنىن ۇسىنادى، ءبىراق رەسەي گازىنىڭ ورنىن الماستىرۋعا ول جەتپەيدى.
سوعان قاراماستان فرانسيانىڭ ەكونوميكا ءمينيسترى بريۋنو لە مەر گەرمانياعا جاساعان ساپارىندا پاريج بەن بەرلين "رەسەيلىك گاز بولمايتىن جاعدايعا دايىندالىپ جاتقانىن" جەتكىزگەن.
پىكىر قالدىرۋ