"Der Spiegel" نەمىس جۋرنالىنىڭ حابارلاۋىنشا، گەرمانيانىڭ BND بارلاۋ اگەنتتىگى رەسەي اسكەرلەرى ۋكراينانىڭ بۋچا قالاسىندا بەيبىت تۇرعىنداردى ءولتىرۋ ماسەلەسىن تالقىلاپ جاتقانى ەستىلەتىن راديوترافيكتەرگە قول جەتكىزگەن.

BND ازىرگە بۇل ماسەلەگە قاتىستى اشىق تۇسىنىكتەمە بەرگەن جوق.

ۋكراينا "رەسەيلىك كۇشتەر بۋچادا 300-دەن استام بەيبىت تۇرعىندى ءولتىردى" دەيدى. ال ماسكەۋ بۇعان قاتىسى جوق ەكەنىن ايتادى.

بۋچا كوشەلەرىنىڭ مايىتكە تولىپ جاتقانىن ايعاقتايتىن سۋرەتتەردەن كەيىن حالىقارالىق قاۋىمداستىق رەسەيدى ايىپتاعان. سۋرەتتەردەن كەي جابىرلەنۋشىلەردىڭ قولىن بايلاپ، باسىنان وق اتقانى كورىنەدى.

ۋكراينا پرەزيدەنتى ۆلاديمير زەلەنسكيي بۋچاداعى قىرعىن ءۇشىن رەسەيدى "گەنوسيد جاسادى" دەپ ايىپتادى، ماسكەۋ ايىپتى ۇزىلدى-كەسىلدى جوققا شىعاردى.

پۋتين 24 اقپاندا ۋكرايناعا شابۋىلداۋ تۋرالى بۇيرىق بەرگەننەن كەيىن رەسەي اسكەرلەرى بۋچانى باسىپ الىپ، قالادان ءبىر ايدان استام ۋاقىتتان كەيىن شىققان.

"BND بارلاۋ مالىمەتتەرى سارسەنبى كۇنگى بريفينگ كەزىندە نەمىس پارلامەنتىندە جاريالاندى" دەپ حابارلادى بەيسەنبىدە "Der Spiegel".

ءبىر راديوحابارلامادا رەسەيلىك ساربازدار ادامداردى جاۋاپقا تارتىپ، كەيىن ولاردى اتىپ تاستاۋ تۋرالى سويلەسكەن كورىنەدى.

تاعى بىرىندە ءبىر سارباز ۆەلوسيپەد مىنگەن بىرەۋدى اتىپ تاستاعانى تۋرالى ايتقان.

رەيتەر اگەنتتىگىنە ءاتى-جونىن اتاماعان قاۋىپسىزدىك قىزمەتكەرى "[گەرمانيا] فەدەرالدىق ۇكىمەتتىڭ قولىندا بۋچادا رەسەيدىڭ قىلمىس جاساعانى تۋرالى دالەلدەر بار ەكەنى راس" دەپ ايتقان.

رەسەي بۋچاداعى جاعداي تۋرالى تۇسىرىلىمدەر "جالعان ءولى دەنەلەر" كورسەتىلگەن، ورىس اسكەرلەرى قالادان شىققاننان كەيىن "ساحنالانعان" دەيدى. الايدا نيۋ-يورك تايمس جاريالاعان 19 ناۋرىزدا جاساندىسەرىكتەن تۇسىرىلگەن سۋرەتتەر رەسەيدىڭ مالىمدەمەسىنە تىكەلەي قايشى كەلدى.

"Maxar" تەحنولوگيالىق كومپانياسى جاساندىسەرىك ارقىلى تۇسىرگەن فوتوسۋرەتتەر بۋچاداعى مايىتتەردىڭ ورنىمەن سايكەس كەلەدى.