شىعىس قازاقستان وبلىستىق ءماسليحاتىنىڭ كەزەكتى XV سەسسياسى بارىسىندا ءوڭىر باسشىسى ءبىلىم سالاسىنادا قوماقتى قارجى ءبولىنىپ جاتقانىن جەتكىزدى.
وتكەن جىلى قارجىلاندىرۋ ءۇش ەسەگە ارتىپ، 211،8 ملرد تەڭگەنى قۇرادى. بارلىعى 644 مەكتەپ، 357 مەكتەپكە دەيىنگى مەكەمە، 72 تەحنيكالىق جانە كاسىپتىك ءبىلىم بەرۋ ۇيىمدارى، دارىندى بالالارعا ارنالعان ينتەرناتتار قارجىلاندىرىلدى.
دانيال احمەتوۆتىڭ ايتۋىنشا، بىلتىر 250 ءپان كابينەتى مەن 600 مىڭ وقۋلىق ساتىپ الىندى، 208 ءبىلىم بەرۋ مەكەمەلەرىندە كۇردەلى جانە اعىمداعى جوندەۋ جۇمىستارى جۇرگىزىلدى. مەكتەپتەردىڭ ينفراقۇرىلىمىن جاقسارتۋ بويىنشا شارالار قابىلدانۋدا.
– وبلىستا ءۇش اۋىسىمدى جانە اپاتتى مەكتەپتەر ماسەلەسى تولىعىمەن شەشىلگەن. مەملەكەت باسشىسى قاسىم-جومارت كەمەل ۇلى توقايەۆتىڭ "قازاقستاندا 2025 جىلدىڭ سوڭىنا دەيىن 1000 مەكتەپ سالۋ" تاپسىرماسىنا سايكەس، وبلىس بويىنشا بارلىعى 33 مەكتەپ سالۋ جوسپارلانىپ وتىر. وتكەن جىلى سەمەي قالاسىنداعى شىعىس كەنتىندە 1200 ورىنعا مەكتەپ سالىندى، ستەپنوي كەنتىندە 300 ورىنعا مەكتەپتىڭ قۇرىلىسى اياقتالۋعا جاقىن. سونىمەن قاتار ريددەردە – 600، ۇلان اۋدانىندا – 320 بالاعا ارنالعان مەكتەپتەر پايدالانۋعا بەرىلمەك. اعىمداعى جىلى 7 مەكتەپتى ىسكە قوسۋ جوسپارلانۋدا، – دەدى دانيال احمەتوۆ.
پىكىر قالدىرۋ