دەنساۋلىق ساقتاۋ ءمينيسترى اجار عينيات پاندەميا كەزىندە بيۋدجەتتەن قانشا قارجى جۇمسالعانى تۋرالى ايتىپ بەردى.  2020 جىلى مەملەكەتتىك قازىنادان كوروناۆيرۋسقا قارسى كۇرەس ءۇشىن 252 ملرد تەڭگە بولىنگەن. 

– بۇل قاراجاتتىڭ 28 ملرد تەڭگەسى دارى-دارمەك پەن مەديسينالىق تەحنيكا ساتىپ الۋعا جۇمسالعان. 197 ملرد تەڭگە دارىگەرلەر مەن سەس قىزمەتكەرلەرىنىڭ ەڭبەكاقىسىن، ۇستەمەاقىسىن، ءىس-ساپار شىعىندارىن تولەۋگە جۇمسالدى. سونىمەن بىرگە 20 ملرد تەڭگە مەديسينالىق ساقتاندىرۋ قورى ارقىلى حالىققا كورسەتەتىن مەديسينالىق كومەك اقىسى تولەندى. سونىڭ ىشىندە 5 ملرد تەڭگە دۇنيەجۇزىلىك بانك ارقىلى جاساندى تىنىس الۋ اپاراتتارىن ساتىپ الۋعا جۇمسالدى، –  دەدى مينيستر. 

ونىڭ ايتۋىنشا، اتالعان سالاعا 2021 جىلى بيۋدجەتتەن 556 ملرد تەڭگە بولىنگەن. 

– بىلتىر كوروناۆيرۋستىڭ 3 تولقىنى بولدى. جىل بويىنا كوروناۆيرۋس ينفەكسياسىنا قارسى كۇرەس جۇرگىزىلدى. ۆاكسينا مەن ينە ساتىپ الۋعا جانە ءتۇرلى زەرتحانالىق زەرتتەۋلەرگە 97 ملرد تەڭگە جۇمسالدى. سونداي-اق دارىگەرلەردىڭ ەڭبەكاقىسى مەن ۇستەماقىسىنا، ءىس-ساپار شىعىندارىنا 413 ملرد تەڭگە، ال مەديسينالىق ساقتاندىرۋ قورىنان قىزمەت اقىسىنا 40 ملرد تەڭگە تولەندى، – دەدى اجار عينيات. 

ال بيىل بيۋدجەتتەن دەنساۋلىق ساقتاۋ سالاسىنا 86 ملرد تەڭگە بولىنگەن. جىل باسىنان بەرى  9 ملرد تەڭگە Vero Cell مەن QazVac ەكپەلەرىن الۋعا جۇمسالسا، 20 ملرد تەڭگە بىلتىر ساتىپ الىنعان Pfizer اقىسىن تولەۋگە ارنالعان.

– وسىلايشا پاندەميا كەزىندە بيۋدجەتتەن جالپى سانى 894 ملرد تەڭگە ءبولىندى، –  دەپ ءسوزىن قورىتىندىلادى مينيستر.