پرەزيدەنتتىڭ 2022 جىلعى 5 مامىرداعى جارلىعىمەن ەلىمىزدىڭ اتا زاڭىنا تۇزەتۋلەر توپتاماسى رەفەرەندۋم شەڭبەرىندە بۇكىلحالىقتىق داۋىس بەرۋگە شىعارىلادى. بۇل تۇزەتۋلەر ساياسي جۇيەنى قايتا قۇرۋ ءۇشىن كوپتەن كۇتكەن شارالاردى قامتىپ، قوعامنىڭ مەملەكەتپەن ءوزارا ءىس-قيمىلى فورماتتارىن جاڭارتۋعا دەگەن سۇرانىسىن كورسەتپەك. ساياسي جۇيەنى تۇبىرىمەن وزگەرتىپ، مەملەكەتتىك باسقارۋ ىسىنە اتسالىسۋ ءۇشىن ازاماتتارعا كەڭ مۇمكىندىكتەر بەرۋ - پرەزيدەنتتىڭ بيىلعى جولداۋىندا ايتىلعان باستامالاردىڭ نەگىزگى ماقساتى وسى.

 

دەموكراتيالاندىرۋ ۇدەرىسىن ءتيىمدى جۇرگىزۋ ءۇشىن ارينە الدىمەن اتا زاڭعا وزگەرىستەر ەنگىزۋ قاجەت. وسى رەتتە پرەزيدەنتتىڭ تاپسىرماسىمەن قۇرامىنا بەلگىلى زاڭگەرلەر، ساياساتتانۋشىلار مەن ساراپشىلار ەنگەن ارنايى جۇمىس توبى قۇرىلىپ، كونستيتۋسيالىق وزگەرىستەردىڭ جوباسى ازىرلەندى. شقو-دا كونستيتۋسيالىق رەفورمالاردى ءتۇسىندىرۋ، ۇيىمداستىرۋ  قوعامدىق توبى قۇرىلىپ، قۇرامىنا ۇكىمەتتىك ەمەس ۇيىمداردىڭ وكىلدەرى، عالىمدار، بلوگەرلەر مەن جۋرناليستەر، جاستار مەن ارداگەرلەر قاۋىمداستىعى، ەتنومادەني ورتالىقتاردىڭ جەتەكشىلەرى كىردى. شتابتىڭ جۇمىسى جايلى ولەگ چەرنىشوۆ ءوز ويىن بىلايشا ساباقتادى.

 

– ءبىز – قازاقستاننىڭ ازاماتتىق قوعامىنىڭ بەلسەندى وكىلدەرى، رەفەرەندۋمدى قوعامدىق قولداۋدىڭ وبلىستىق شتابىنا توپتاستىق. ءبىزدىڭ قاتارىمىز ەلىمىزدىڭ ءىرى ۇكىمەتتىك ەمەس ۇيىمدارى وكىلدەرىن، عالىمداردى، بلوگەرلەر مەن جۋرناليستەردى، جاستار مەن ارداگەرلەر قاۋىمداستىعىن، ەتنومادەني ورتالىقتاردىڭ جەتەكشىلەرىن بىرىكتىرەدى. شتابىمىز قۇرىلدى، سەبەبى ءبىز ۇسىنىلعان كونستيتۋسيالىق وزگەرىستەردىڭ باعىتتارىن تولىق قولدايمىز. سونداي-اق، قازاقستاننىڭ ءاربىر ازاماتى كونستيتۋسياعا وزگەرىستەر ەنگىزۋ قاجەتتىگى تۋرالى ءوز پىكىرىن بىلدىرۋگە قۇقىلى ەكەنىنە نىق سەنىمدىمىز. سوندىقتان دا ءبىز مەملەكەت باسشىسىنىڭ كونستيتۋسياعا ۇسىنىلاتىن تۇزەتۋلەردى رەفەرەندۋم شەڭبەرىندە بۇكىلحالىقتىق داۋىس بەرۋگە شىعارۋ تۋرالى شەشىمىن قولدايمىز، – دەدى شىعىس قازاقستان وبلىستىق شتابتىڭ مۇشەسى ولەگ مىرزا.

 

سونىمەن قاتار شتاب مۇشەلەرى بارشا قازاقستاندىقتاردى بەلسەندى ازاماتتىق ۇستانىم تانىتىپ، رەسپۋبليكالىق رەفەرەندۋمدا داۋىس بەرۋگە، قاتىسۋعا شاقىردى.