1 ماۋسىمدا ازاتتىق راديوسى قاڭتار قۇرباندارىنا ارنالعان ارنايى جوبانى تانىستىردى. ول جەردە 5-8 قاڭتار كۇندەرى قازاقستان قالالارىندا وققا ۇشقان نەمەسە سول كەزدە العان جاراقاتتان قايتىس بولعاندار جايلى اقپاراتتار توپتاستىرىلعان.

"قاندى قاڭتار قۇرباندارى" دەپ اتالاتىن ارنايى جوبادا ءقازىر 188 ادامنىڭ ءاتى-جونى بار. ونداعى ارنايى كاتەگوريالار ارقىلى قۇربانداردىڭ جاسى، وقيعا ورنى، ءولىمىنىڭ سەبەپتەرى جانە وزگە اقپاراتتى ىرىكتەپ وقۋعا دا بولادى. باسىلىم جوبا قازا بولعانداردىڭ تۋىستارى مەن كۋالەردىڭ بايانداۋلارى ارقىلى قايعىلى وقيعانىڭ اۋقىمىن ۇعىنۋعا مۇمكىندىك بەرەتىنىن جازادى.

– جاڭا قازاقستان تاريحىندا قاڭتار قاسىرەتى سياقتى مۇنداي دەڭگەيدەگى اۋىر قىلمىس، اۋىر وقيعا، ۇلكەن سىناق قازاق حالقىنىڭ باسىندا بولعان ەمەس. ازاتتىقتىڭ سىزدەردى وسى شاراعا شاقىرۋىنىڭ باستى سەبەبى – وقيعادان قازا بولعان 238 ادامنىڭ ءتىزىمىن جاساۋعا تالپىندىق. بيلىك مۇنى جاريالاعان جوق. بەس اي بويى ءبىز قازاقستانداعى تاۋەلسىز، ازات مەديانىڭ وكىلى رەتىندە وسى ازاماتتاردى ىزدەدىك، قازا بولعانداردىڭ ءاتى-جونىن تۇگەندەدىك، كوپشىلىگىمەن سويلەستىك. كوپشىلىگىنىڭ ۇيىنە باردىق، ارتىنداعى جەسىرىن، جىلاپ قالعان جەتىمىمەن تىكەلەي تىلدەستىك. بۇل ارەكەتكە جۋرناليستىك پارىزىمىزبەن، ءوزىمىڭزدىڭ مىندەتىمىزبەن باردىق. بۇل جۇمىس ەندى عانا باستالدى دەۋگە بولادى، – دەدى ازاتتىقتىڭ الماتى بيۋروسى جەتەكشىسىنىڭ مىندەتىن ورىنداۋشى قاسىم امانجول جوبانى تانىستىرۋ ءىس-شاراسىندا.

شاراعا ازات ەۋروپا/ازاتتىق راديوسى مەدياكورپوراسياسىنىڭ پرەزيدەنتى دجەيمي فلاي، ورتالىق ازيا ايماعى بويىنشا ديرەكتور حاميد يسمايلوۆ، ازاتتىقتىڭ قازاق قىزمەتىنىڭ ديرەكتورى توروكۋل دووروۆ جانە قاڭتارداعى وقيعالار كەزىندە قازا بولعانداردىڭ تۋىستارى، ازاپتاۋعا ۇشىراعاندار، قۇقىق قورعاۋشىلار، جۋرناليستەر مەن بەلسەندىلەر قاتىسقان.