سەناتور مارات باقتيار ۇلى اعىلشىن ءتىلىن ءبىلۋ مەن ونى تەرەڭ يگەرۋ ەلدەگى 3،5 ميلليون وقۋشىنىڭ بارلىعىنا بىردەي قاجەت پە دەگەن ماسەلە كوتەرىپ، ءۇشتىلدى وقىتۋ جۇيەسىن توقتاتۋ قاجەتتىگىن ايتتى. بۇل تۋرالى Sputnik قازاقستان سايتى حابارلادى.
– ءسوز جوق، جاستارىمىز اعىلشىن ءتىلىن ءبىلۋى كەرەك. بۇل – ۋاقىت تالابى. ءبىراق اعىلشىن ءتىلىن ءبىلۋ مەن ونى تەرەڭ يگەرۋ ەلىمىزدەگى 3،5 ميلليون وقۋشىنىڭ بارلىعىنا بىردەي قاجەت پە؟ بالاباقشاداعى، ءبىرىنشى سىنىپتاعى ويلاۋ جۇيەسى ءالى تولىق جەتىلىپ قالىپتاسپاعان، ساناسى ۇلبىرەپ تۇرعان قازاق سابيلەرىنە بىردەن ءۇش ءتىلدى وقىتۋدىڭ نە قاجەتى بار؟ ءبىلىم مەن عىلىمى جوعارى جاپونيا، فينليانديا، فرانسيا، جۇڭگو 10 جاسقا دەيىن بالالالارىن وزگە تىلدە نەگە وقىتپايدى؟، – دەدى باقتيار ۇلى سەناتتىڭ جالپى وتىرىسىندا.
وسى ورايدا سەناتور الەمنىڭ وزىق وتىز ەلدەگى ءبىلىم بەرۋ جۇيەسىن مىسالعا كەلتىردى. ونىڭ ايتۋىنشا، ەكى ءتىل ءبىرىنشى سىنىپتا ءتورت-اق ەلدە، ەكىنشى سىنىپتا بەس ەلدە، ال ءتورتىنشى سىنىپتا ون ەكى ەلدە عانا وقىتىلادى.
– ال قازاقستاننان باسقا الەمنىڭ بىردە-بىر مەملەكەتىندە ءۇش ءتىل مۇلدەم وقىتىلمايدى. دەمەك، شەت ءتىلىن ءبىلۋ ساۋاتتى بولۋدىڭ باستى كورسەتكىشى ەمەس، ول الەمنىڭ ءبىلىم-عىلىمنىڭ بيىگىن يگەرۋ ءۇشىن قاجەتتى قۇرال. ال شىنايى ساۋاتتىلىق – ءومىردى ءبىلۋ، ءوزىڭ تاڭداعان كاسىپتى تەرەڭ يگەرۋ، قاجەتتى داعدىلار مەن قابىلەتتەردى قالىپتاستىرۋ. ەل پرەزيدەنتى قاسىم-جومارت توقايەۆ شەت ءتىلدى وقىتۋدى اتا-انالاردىڭ قالاۋىمەن 5ء-شى سىنىپتان باستاۋ ورىندى ءارى ءتيىمدى بولادى دەپ ايتقان. ءبىز دە بالاباقشالار مەن باستاۋىش سىنىپتارداعى بارلىق ءپان تەك انا تىلىندە وقىتىلۋىن قولعا الۋىمىز كەرەك، – دەپ اتاپ كورسەتتى سەنات دەپۋتاتى.
سەناتور تاۋەلسىزدىك جىلدارى ءبىلىم سالاسى ەڭ كوپ رەفورماعا ۇشىراعانىن دا ەرەكشە اتاپ ءوتتى. مىسالى، سوڭعى بەس جىل ىشىندە ءبىلىم تۋرالى زاڭعا 29 رەت وزگەرىس پەن تولىقتىرۋ ەنگىزىلسە، مەملەكەتتىك ءبىلىم بەرۋ ستاندارتى جەتى رەت وزگەرىسكە ۇشىراعان.
– ءاربىر وزگەرىس سايىن وقۋلىقتىڭ مازمۇنى جاڭارىپ، قىرۋار قارجى جۇمسالىپ، جاڭادان وقۋلىقتار باسىلىپ جاتادى. دامىعان ەلدەردە، ماسەلەن، جاپونيادان مەملەكەتتىك ءبىلىم بەرۋ ستاندارتى بىرنەشە جىل تالقىلانىپ، سوڭعى رەت 2010 جىلى وزگەرتىلىپ، وسى كەزگە دەيىن وزگەرىس بولعان جوق، – دەپ اتاپ كورسەتتى باقتيار ۇلى.
ونىڭ ويىنشا، ەلدە جاڭارتىلعان ءبىلىم بەرۋ باعدارلاماسىن جاساۋ جاعىنان اسىعىستىققا جول بەرىلگەن. ال ورتا ءبىلىم شەكسىز رەفورمالاردىڭ تاجىريبەلىك الاڭىنا اينالىپ كەتكەن. وعان قوسا، سوڭعى ءۇش جىل ىشىندە 1،2 ميلليون ءسابي دۇنيەگە كەلدى. الداعى ۋاقىتتا ولاردىڭ بارلىعىن ورتا بىلىممەن قامتۋ ماسەلەسى تۋىندايدى. ول ءۇشىن، كەم دەگەندە، ءۇش مىڭ مەكتەپ سالۋ قاجەت.
سەناتور باقتيار ۇلى وسى ماسەلەگە جاۋاپتى ۇكىمەت باسشىسىنىڭ ورىنباسارى ەرالى توعجانوۆقا دەپۋتاتتىق ساۋال جولداپ، ماسەلەنىڭ ءمان-جايىن ءتۇسىندىرۋدى سۇرادى.
پىكىر قالدىرۋ