ءماجىلىس دەپۋتاتتارى، «AMANAT» پارتياسى فراكسياسىنىڭ مۇشەلەرى سنەجاننا يماشيەۆا، مالىك قۇلشار جانە قازاقستان حالقى اسسامبلەياسى اتىنان سايلانعان اۆەتيك اميرحانيان قۇرىلىس ماتەريالدارىن وندىرەتىن «ورال ساۋدا-ونەركاسىپتىك كومپانياسى» زاۋىتىندا بولدى.

حالىق قالاۋلىلارى زاۋىت قىزمەتكەرلەرىنە كونستيتۋسياعا ەنگىزىلەتىن وزگەرىستەر مەن تولىقتىرۋلاردىڭ ماڭىزدىلىعىن ءتۇسىندىرىپ، الداعى رەفەرەندۋمعا بەلسەندى اتسالىسۋعا شاقىردى.

– پرەزيدەنت قاسىم-جومارت توقايەۆ كونستيتۋسياعا وزگەرىستەر ەنگىزۋ بويىنشا رەسپۋبليكالىق رەفەرەندۋم وتكىزۋدى ۇسىندى. رەفەرەندۋم – جولداۋدا جاريالانعان رەفورمالاردى حالىقتىڭ تاڭداۋىمەن جۇزەگە اسىرۋ.  مەملەكەت باسشىسى ءارقاشاندا ازاماتتاردى شەشىم قابىلداۋعا بەلسەندى قاتىسۋعا شاقىرىپ كەلەدى. كونستيتۋسيالىق وزگەرىستەر بويىنشا ەندى ارالاس سايلاۋ جۇيەسى ارقىلى پارتياعا مۇشە ەمەس ازاماتتار دا پارلامەنتكە سايلانا الادى. ەگەر رەفەرەندۋمدا داۋىس بەرۋشىلەر وسى وزگەرىستەردى قولداسا، وندا ءبىز پرەزيدەنت ايتقان جاڭا، ادىلەتتى قازاقستان قۇرۋعا مۇمكىندىك الامىز. بۇل – ەلىمىزدىڭ دامۋى ءۇشىن ماڭىزدى قادام، – دەدى سنەجاننا يماشيەۆا.

ال دەپۋتات قۇلشار مالىك ەلىمىزدىڭ بولاشاعى ءاربىر ازاماتتىڭ تاڭداۋىنا بايلانىستى ەكەنىنە نازار اۋداردى.

دەپۋتات اۆەتيك اميرحانياننىڭ ايتۋىنشا رەفەرەندۋم ءاربىر ادام ءۇشىن ءوزىنىڭ ازاماتتىق ۇستانىمىن كورسەتۋگە مۇمكىندىك بەرەدى.

– كونستيتۋسيا مەملەكەتتىڭ ەڭ باستى قۇجاتى. وعان ەنگىزىلەتىن وزگەرىستەردە قازاقستاندىقتاردىڭ پىكىرى ايرىقشا ماڭىزدى، – دەدى ول.

 ودان ءارى كاسىپورىن قىزمەتكەرلەرى تولعاندىرعان سۇراقتارىن قويىپ،  ۇسىنىستارىن جەتكىزدى.

دەپۋتاتتار جينالعانداردىڭ الەۋمەتتىك ماسەلەلەرگە قاتىستى ساۋالدارىنا جاۋاپ بەرىپ، ءتۇسىندىرۋ جۇمىستارىن جۇرگىزدى.

«ورال ساۋدا-ونەركاسىپ كومپانياسى» – قازاقستانداعى پوليەتيلەن ترۋبالارىن وندىرەتىن وبلىستاعى ەڭ ءىرى كاسىپورىنداردىڭ ءبىرى. وندىرىستىك كەشەن 12 سەحتان تۇرادى.

كاسىپورىن جىلىنا 37 500 توننا پوليەتيلەن وندىرەدى. قازاقستاندى قامتاماسىز ەتۋمەن قاتار، رەسەيگە، وزبەكستانعا، قىرعىزستانعا تاسىمالدايدى. 

 ق ر پارلامەنتى ءماجىلىسى اپپاراتىنىڭ باسپا ءسوز قىزمەتى