ءماجىلىس دەپۋتاتتارى دارحان مىڭباي، قۇدايبەرگەن ەرجان، قاينار اباسوۆ جانە سىرىم ەرتايەۆ وڭىرلەرگە ساپار اياسىندا تۇركىستان وبلىسىنا باردى.

وندا دەپۋتاتتار جەرگىلىكتى تۇرعىندارعا كونستيتۋسيالىق تۇزەتۋلەردى ءتۇسىندىرىپ، رەفەرەندۋمعا قاتىسۋعا شاقىردى.

بۇگىن شتاب مۇشەلەرى تۇلكىباس اۋدانى، ميچۋرين اۋىلدىق وكرۋگىندە شارۋا قوجالىق يەلەرىمەن جانە كاسىپكەرلەرمەن كەزدەسىپ، جالپىحالىقتىق رەفەرەندۋمدى وتكىزۋدىڭ العىشارتتارىن، ۇسىنىلعان رەفورمالاردىڭ ەرەكشەلىكتەرى تۋرالى باياندادى.

– جالپى وبلىستا حالىقپەن جۇزدەسكەندە بىرنەشە ماسەلە كوتەرىلدى.  سونىڭ ىشىندە ايەل ازاماتتاردىڭ زەينەت جاسىن قىسقارتۋعا ەرەكشە ءمان بەرىلۋدە. بۇدان بولەك، جايىلىم جەر تاپشىلىعى، ونەركاسىپ ورىندارىن اشۋ، سۋبسيديا الۋ، اگرو بانك قۇرۋ توڭىرەگىندە ۇسىنىستار ايتىلدى. بۇل رەفەرەندۋم شىن مانىندە ادىلەتتى قازاقستان قۇرۋ جونىندەگى ساياسي رەفورمالاردى جۇزەگە اسىرۋدىڭ العىشارتى، – دەدى دارحان مىڭباي.

كەزدەسۋدە اۋىل تۇرعىندارى بەلسەندىلىك تانىتىپ، وزدەرىن تولعاندىرعان ساۋالدارىن قويىپ، پىكىر الىستى. سولاردىڭ ءبىرى تۇلكىباس كەنتى ارداگەرلەر كەڭەسىنىڭ ءتوراعاسى س.توعىسبايەۆ ءبىرقاتار ۇسىنىس ايتىپ، جاڭا وزگەرىستەرگە كوڭىلى تولاتىنىن جەتكىزدى.

– وسىعان دەيىنگى قولدانىستاعى زاڭداعى 98 باپتىڭ 33-نە وزگەرىس ەنگىزۋ جونىندەگى ماتىندەرمەن تۇگەل تانىسىپ شىقتىم. ارينە، وتە قۇپتارلىق ماسەلە. سەبەبى، ءبىز بولاشاقتا جاڭا قازاقستان ءۇشىن ادىلدىك پەن اشىقتىقتى جانە دەموكراتيالىق رەفورمالاردى قولداۋىمىز كەرەك. ول ءۇشىن الدا وتەتىن بۇكىلحالىقتىق رەفەرەندۋمعا بارلىق ازاماتتاردى، اسىرەسە، جاستارعا وزدەرىنىڭ بولاشاقتارى ءۇشىن كەلىپ داۋىس بەرۋگە شاقىرامىن، – دەدى اۋىل اقساقالى.

«AMANAT» پارتياسىنىڭ تۇركىستان وبلىستىق فيليالىنىڭ اقپاراتى بويىنشا