مەكتەپ وقۋشىلارى 3 ساعاتتا روبوت ماشينا قۇراستىردى. «INFOMATRIX – ASIA» حالىقارالىق كومپيۋتەرلىك جوبالار جارىسىنىڭ جەڭىمپازى ەراسىل قايىپوۆ بايقاۋ جايلى پىكىرىمەن ءبولىستى.

6-7 ماۋسىم ارالىعىندا سۋلەيمان دەميرەل اتىنداعى ۋنيۆەرسيتەتتە حالىقارالىق «INFOMATRIX - ASIA» بايقاۋى ءوتتى. ەلىمىزدەن جانە وزگە ەلدەردەن جارىسقا 365 ونەرتاپقىش قاتىستى. قاتىسۋشىلار 6 باعىت بويىنشا جوبالارىن ۇسىندى: Robotics Computer، Programming Computer، Art Hardware، Control Systems، Short Movie، Mathematics Project.

Robotics Computer باعىتى بويىنشا كومانداسىمەن ءى ورىن العان ەراسىل قايىپوۆ – شىمكەنت قالاسىنداعى «ءبىلىم-يننوۆاسيا» مەكتەبىنىڭ 10-سىنىپ وقۋشىسى. ونىڭ ايتۋىنشا، مۇنداي جارىستار IT سالاسى بويىنشا وزگە وقۋشىلارمەن تاجىريبە الماسۋعا كومەكتەسەدى.

«ءبىز بۇل جارىستىڭ بولاتىنىن ءبىر اي بۇرىن بىلدىك. بىرنەشە اپتا بويى Arduino USB بازالىق پلاتفورماسى ارقىلى روبوت ماشينا قۇراستىرىپ، بايقاۋعا دايىندالدىق. بۇل جەڭىس ءبىزدىڭ كوماندامىزعا تىنىمسىز ەڭبەكتىڭ ارقاسىندا كەلدى. جارىستا تاپسىرمانى ورىنداۋعا 5 ساعات ۋاقىت بەرىلدى، ءبىراق ءبىز 3 ساعاتتا روبوت ماشينانى قۇراستىردىق. روبوتىمىز تىك ءتورتبۇرىش ارەنادا ءار بۇرىشتا تۇرعان زاتتاردى الىپ، ورتاداعى سارى شەڭبەرگە قويادى. ونى Bluetooth مودۋل ارقىلى تەلەفونداعى قوسىمشانىڭ كومەگىمەن باسقارامىز، بەلگىلى ءبىر گرادۋستا قيسايتا الامىز. بايقاۋدا ءى ورىن العانىمىزعا وتە قۋانىشتىمىز. مۇنداي جارىستار بىزگە وزگە مەملەكەتتىڭ باعدارلامالاۋعا قىزىعاتىن جاس ونەرتاپقىشتارىمەن تانىسۋعا، تاجىريبە الماسۋعا كومەكتەسەدى»، – دەپ ءتۇسىندىردى ول.

جەڭىمپاز كوماندانىڭ مۇشەسى ءالينۇر تۇردىقۇل كەلەسى جىلى 11-سىنىپ بىتىرگەندە وسىنداي حالىقارالىق بايقاۋلاردان العان جەتىستىكتەرى ۋنيۆەرسيتەتكە گرانتقا تۇسۋگە كومەكتەسەتىنە قۋانىشتى ەكەنىن جەتكىزدى.

شارانىڭ ۇيىمداستىرۋشىسى، IT سالاسىنىڭ مامانى يسمايل گەساننىڭ ايتۋىنشا، جىلدان جىلعا جارىسقا قاتىسۋشى وقۋشىلاردىڭ دەڭگەيى جوعارىلاپ، قاتىسقىسى كەلەتىن وقۋشىلاردىڭ سانى ارتىپ كەلەدى.

«INFOMATRIX – ASIA» بيىل 8ء-شى رەت ۇيىمداستىرىلىپ وتىر. جارىس جىل سايىن ءداستۇرلى تۇردە سۋلەيمان دەميرەل ۋنيۆەرسيتەتىندە ۇيىمداستىرىلادى. بۇل بايقاۋدىڭ باسقالاردان ايىرماشىلىعى – ءبىر كاتەگوريا بويىنشا عانا ەمەس، 6 باعىت بويىنشا وتكىزىلۋى. بالالاردىڭ IT سالاسى بويىنشا قابىلەتتەرىن ءارتۇرلى باعىتتار بويىنشا تەكسەرۋ وتە ماڭىزدى. جارىسقا 400-دەن استام جوبا تىركەلدى. كوميسسيا مۇشەلەرى 165 جوبانى ىرىكتەپ الدى. بايقاۋعا بارلىعى 365 وقۋشى قاتىستى. ولاردىڭ جۇمىستارىن Google، Facebook سياقتى الەمدىك كومپانيالاردى جۇمىس ىستەيتىن ماماندار باعالادى. بيىل قاتىسۋشىلاردىڭ دەڭگەيى جوعارى. بالالاردىڭ اقپاراتتىق تەحنولوگيالار سالاسىنا قىزىعۋشىلىعى ارتىپ كەلەدى، جىلدان جىلعا دەڭگەيلەرى دە جاقسارىپ كەلە جاتقانىن بايقادىق. بولاشاقتا وسى وقۋشىلار مىقتى IT مامانى بولادى دەگەن ۇمىتتەمىن»، – دەدى «ءبىلىم-يننوۆاسيا» حالىقارالىق قورى IT-دەپارتامەنتىنىڭ باسشىسى.

اقپاراتتىق تەحنولوگيالار سالاسىن دامىتۋعا باعىتتالعان بايقاۋ ق ر ءبىلىم جانە عىلىم مينيسترلىگىنىڭ قولداۋىمەن «ءبىلىم-يننوۆاسيا» حقق ۇيىمداستىرۋىمەن ءوتتى.