باس پروكۋراتۋرا قىزدى ەركىنەن تىس الىپ قاشۋدىڭ اۋىر قىلمىس ەكەنىن حابارلادى. 

"قىز الىپ قاشۋ – ءسالت-داستۇر مە، قىلمىس پا، مۇنى اجىراتۋدىڭ ءبىر جولى بار، ول – قالىڭدىقتىڭ كەلىسىم بەرۋى جانە الىپ قاشقان ادامداردىڭ وسىنداي كەلىسىمنىڭ بارىن ءتۇسىنۋى. باسقاشا ايتقاندا، كەلىسىم بەرمەگەن قىزدى ەركىنەن تىس الىپ قاشسا، كۇشتەپ ۇستاپ، باسقا جەرگە اپارسا، الىپ قاشقاندار وسى ءمان-جايدى بىلسە – بۇل اۋىر قىلمىس سانالادى. قىلمىستىق كودەكستىڭ 125-بابى – ادام ۇرلاۋ بويىنشا 4 جىلدان 7 جىلعا دەيىن باس بوستاندىعىنان ايىرۋ جازاسى قاراستىرىلعان. ال ەگەر كامەلەتكە تولماعان قىزدى ۇرلاسا، بۇل جاعدايدا 7 جىلدان 12 جىلعا دەيىن سوتتالۋى مۇمكىن جانە مۇلكى تاركىلەنەدى"، دەپ ءمالىم ەتتى باس پروكۋراتۋرا.

قىز الىپ قاشقان ادامدار ءۇشىن ەڭ قاتاڭ جازا – 15 جىلعا باس بوستاندىعىنان ايىرۋ. توپ بولىپ الىپ قاشقان جاعدايدا جانە جابىرلەنۋشى قىزدى ابايسىزدا ءولتىرىپ الۋ نەمەسە باسقا دا اۋىر جايتتار بولعان كەزدە وسىنداي اۋىر جازا قولدانىلادى. 

"ەگەر ءسىزدى الىپ قاشسا نەمەسە كوز الدىڭىزدا وسىنداي جاعداي بولسا، دەرەۋ 102 قىزمەتىنە قوڭىراۋ شالىڭىز. پوليسياعا مۇمكىندىگىنشە كولىكتىڭ ماركاسى، ءتۇسى، ءنومىرى، الىپ قاشقانداردىڭ تۇر-الپەتى، كيىمى سەكىلدى ەرەكشە بەلگىلەردى حابارلاڭىز. بۇل جاعدايدا جاي عانا كۋاگەر بولساڭىز دا، ارىز جازىلماسا دا قىلمىستىق ءىس قوزعالىپ، تەرگەۋ باستالادى. ەگەر ۇرلاعان ادام جابىرلەنۋشىنى بوساتسا جانە ونىڭ ارەكەتىندە قىلمىستىق قۇرام بولماسا، ول قىلمىستىق جاۋاپكەرشىلىكتەن بوساتىلادى" دەلىنگەن حابارلامادا.

قازاقستاندا زاڭ بويىنشا نەكە جاسى – 18 بولىپ بەكىتىلگەن.