2022 جىلعى ساۋىردە 83،5 مىڭ اۆتوكولىك قۇرالى ەسەپكە قويىلعان، بۇل – وتكەن جىلدىڭ سايكەس كەزەڭىمەن سالىستىرعاندا 0،4% از، ونىڭ ىشىندە جۇك اۆتوموبيلدەرىنىڭ سانى 18،7%-عا، اۆتوبۋستاردىكى 29،1%-عا كەمىدى، بۇل رەتتە جەڭىل اۆتوموبيلدەردىڭ سانى 1،5%-عا ارتتى، دەپ حابارلادى ۇلتتىق ستاتيستيكا بيۋروسى.
2022 جىلعى 1 مامىرداعى جاعداي بويىنشا قازاقستاندا تىركەلگەن اۆتوكولىك سانى 4 357،6 مىڭ بىرلىكتى قۇراعان، ونىڭ ىشىندە 87،8% – جەڭىل اۆتوموبيلدەر، 10،4% – جۇك، 1،8% – اۆتوبۋستار.
جەڭىل اۆتوموبيلدەر اۆتوپاركىندە 20 جىل بۇرىن شىعارىلعان اۆتوموبيلدەر 50،3 پايىزدى قۇرايدى. شىققانىنا 10-نان 20 جىلعا دەيىنگى اۆتوكولىك قۇرالدارىنىڭ ۇلەسى – 21،1%، 7-10 جىل ارالىعىنداعىلار – 14،5%، 3-7 جىل بولعاندار – 6،4%، ماشينالاردىڭ تەك 7،6 پايىزىنىڭ پايدالانۋ مەرزىمى 3 جىلدان كەم. شىعارىلعان جىلى 20 جىلدان استام اۆتوموبيلدەردىڭ ۇلەسى جۇك كولىكتەرى اراسىندا – 60،8%، اۆتوبۋستار بويىنشا – 42،2 پايىزدى قۇرايدى.
اۆتوموبيلدەردىڭ باسىم بولىگى الماتى وبلىسىندا (534،7 مىڭ)، الماتى قالاسىندا (508،7 مىڭ) جانە قاراعاندى وبلىسىندا (310 مىڭ) تىركەلگەن. ەڭ ازى اتىراۋ وبلىسىندا (116،9 مىڭ).
جانارماي رەتىندە جەڭىل اۆتوكولىكتەر نەگىزىنەن بەنزيندى پايدالانادى (87،8%)، كولىك قۇرالدارىنىڭ 8% ارالاس وتىنمەن جۇرەدى. جۇك كولىكتەرىنىڭ 48،7%-ى ديزەل وتىنىمەن، قالعاندارى بەنزين (45،9%) مەن ارالاس وتىن ەسەبىنەن (2،2%) قوزعالادى.
پىكىر قالدىرۋ