قازاقستان پرەزيدەنتىنەن ايەلدەردىڭ زەينەت جاسىن 58-گە دەيىن، قاراۋىندا ەرەكشە بالالارى بار انالاردىڭ زەينەت جاسىن 55-كە دەيىن تومەندەتۋدى سۇراعان ونلاين پەتيسيا 821907 قول جينادى. ونىڭ ىشىندە پەتيسيانى قولداپ بەرىلگەن داۋىس – 818 مىڭ 485، قارسى داۋىس – 3422.

پەتيسيا اۆتورى 45 جاستان باستاپ ايەلدەر دەنساۋلىعىندا ءتۇرلى كىنارات تابىلاتىنىن، ايەلدەر وتباسىنا كوڭىل ءبولىپ، بەينەتتىڭ زەينەتىن كورگەنىن قالايتىنىن ايتادى.

"ۇمىتپاڭىز، ءارقايسىمىزدىڭ انامىز بار" دەگەن اۆتور پەتيسيانى مۇمكىن بولعان بارلىق الەۋمەتتىك جەلى مەن مەسسەندجەرلەر ارقىلى تاراتۋدى وتىنگەن.

بۇعان دەيىن ۇكىمەت ازاماتتاردىڭ كەي كاتەگوريالارىنىڭ زەينەت جاسىن تومەندەتۋدى قاراستىراتىنى، ماسەلە جىل سوڭىنا دەيىن بەلگىلى بولاتىنى حابارلانعان. قازىرگى ۋاقىتتا ايەلدەر ءۇشىن زەينەت جاسى  60-61 جاس ارالىعىندا.