شىعىس قازاقستان وبلىسىندا اۋتيزمگە شالدىققان بالا ەكىنشى كۇن دەگەندە تابىلدى. ەرەكشە بالانىڭ جوعالۋى سوڭعى اپتالارداعى ەكىنشى جاعداي بولىپ وتىر. وكىنىشكە قاراي، 7 تامىزدا قوستاناي وبلىسىندا جوعالعان 5 جاسار مادينا ەرجان قىزىنىڭ وقيعاسى بۇلاي جاقسى اياقتالعان جوق. قىزدىڭ دەنەسى ارادا بىرنەشە كۇن وتكەندە سۋدان تابىلدى. مادينانى ىزدەۋ كەزىندە ونى الدەكىمدەر بىرنەشە جەردەن كورگەنى تۋرالى اقپاراتتار شىقتى. الايدا ءبۇردىرشىننىڭ بەيساۋىت ءجۇرىسىنىڭ سەبەبىن ەشكىم بىلە الماعان. وعان مادينا سويلەي الماعانى سەبەپ بولۋى مۇمكىن دەگەن دە نۇسقالار ايتىلدى. ارنايى مامان، قازاقستان اۋتيزم قاۋىمداستىعىنىڭ جەتەكشىسى ءنۇريا بالتاباي قىزى قوعام اۋتيزم بەلگىلەرى بار بالالارمەن قارىم-قاتىناس قۇرۋ جولدارىن بىلگەنى اسا ماڭىزدى ەكەنىن ايتادى. تومەندە مامانننىڭ الەۋمەتتىك جەلىدە جازعان كەڭەستەرى ۇسىنىلىپ وتىر.
ساراپشىنىڭ سوزىنشە، اۋتيزمگە شالدىققان نەمەسە پسيحو-سويلەۋ دامۋىندا كەشىگۋى بار بالا بىرەۋدىڭ وزىنە سويلەگەنىن ەلەمەۋى مۇمكىن.
"ادەتتە، ولاردىڭ اراسىندا سويلەمەيتىن، ىممەن ءتۇسىندىرۋى دامىماعان بالالار كوپ، مىنەز-قۇلىقتارىندا بۇزىلىستار كەزدەسەدى. قوعامدا نەمەسە كوشەدە ولار "ءبىرتۇرلى" كورىنۋى مۇمكىن. مۇنداي بالالاردىڭ كەيبىرى الدەبىر نارسەگە رەاكسيا كەش تانىتىپ، كەيبىرى كەرىسىنشە گيپەربەلسەندى بولۋى مۇمكىن. ولار كەز-كەلگەن قاتتى دىبىستان، جارىقتان، وتكىر شۋدان قورقۋى مۇمكىن. مۇنداي بالالار ەدەنگە (اسفالتقا، جەرگە) جاتىپ، قۇلاقتارىن قولدارىمەن جاۋىپ، ەسىمىن اتاسا قاراماۋى نەمەسە سۇراقتارعا جاۋاپ بەرمەۋى مۇمكىن" دەگەن ساراپشى ادامداردان مۇنداي جاعدايدا ءوزىن قالىپتى ۇستاۋدى، داۋىس كوتەرمەۋدى، بالاعا ايقايلاماۋدى جالىنا سۇرايدى.
بالا تابىلعان كەزدە دىبىس ەففەكتىلەرىن باسەڭدەتىپ، جارىقتى كوبىرەك ءتۇسىرۋ كەرەكتىگىن ايتادى.
"سونداي-اق مۇنداي بالالار كوبىنە فيزيكالىق تۇرعىدان جاقسى دامىعانىن ەستە ۇستانعان ءجون. ولار قولدان دەمدە بوساپ، جولعا قاراي جۇگىرىپ كەتۋى مۇمكىن. ەگەر وسىنداي بالا ەرەسەكتەردىڭ نەمەسە تۋىستارىنىڭ ەرتۋىنسىز جۇرگەنىن بايقاساڭىز، دەرەۋ پوليسياعا جانە جەدەل جاردەمگە حابارلاڭىز. بالانىڭ تۋىستارىن تابۋعا تىرىسىڭىز. مۇمكىن، بالا قاشىپ نە جوعالىپ كەتىپ، تۋىستارى جاقىن جەردە بولۋى مۇمكىن. وسى ۋاقىت ىشىندە ءسىز بالانى ۇيالى تەلەفونمەن جۇباتا الاسىز، مىسالى، مۋلتفيلم كورسەتىڭىز، ويىنشىق بەرىڭىز. قاجەت بولسا، سۋ ىشكىزىڭىز. ەگەر بالادا كيىم بولماسا، وندا قولىڭىزدا بار كەز-كەلگەن كيىمدى (قالپاق، جەمپىر، فۋتبولكا، شارف جانە ت.ب.) بەرىڭىز. بۇل جەردە الدىمەن بالا كيىمگە قول تيگىزىپ كورگەنى اسا ماڭىزدى. سودان كەيىن مۇقيات كيىندىرىڭىز" دەيدى ءنۇريا بالتاباي قىزى.
قاۋىمداستىق جەتەكشىسى قالاي بولعاندا دا بەيستاندارت نەمەسە ستەرەوتيپتىك مىنەز- قۇلىقتىڭ بارلىق كورىنىستەرىنە سابىرلى بولۋعا، ەرەكشە بالامەن دوستىق قارىم-قاتىناستا سويلەسۋگە، جەكە سوزدەردى نەمەسە نۇسقاۋلاردى انىق جانە اسىقپاي ايتۋعا شاقىرادى.
پىكىر قالدىرۋ