الماتىدا "قازپوشتانىڭ" 100-گە جۋىق قىزمەتكەرى نارازىلىققا شىقتى، دەپ حابارلادى جۋرناليست ميحايل كوزاچكوۆ Telegram پاراقشاسىندا.

باستاماشى توپ الماتىداعى "قازپوشتا" فيليالدارىنىڭ ءبىرىنىڭ الدىنا جينالعان.

"بۇگىن "قازپوشتا" قىزمەتكەرلەرى ەرەۋىلگە شىقتى. ولار جالاقىنى كوتەرۋىن تالاپ ەتىپ وتىر (بۇگىندە ولار قولىنا 80-90 مىڭ تەڭگە، ال پوشتاشىلار 40 مىڭ تەڭگەدەن از الادى)"، دەپ جازدى ميحايل كوزاچكوۆ. 

الماتىعا "قازپوشتا" باسقارما ءتوراعاسى سەرىك ساۋدابايەۆ ۇشىپ كەلگەنى حابارلاندى. ول جۇمىسشىلارمەن كەلىسسوز جۇرگىزبەك.

"الەۋمەتتىك جەلىلەردە جاريالانعان جالاقى مولشەرى تۋرالى اقپاراتتىڭ شىندىققا جاناسپايتىنىن حابارلايمىز. 40 مىڭ تەڭگە كولەمىندەگى تولەمدى 0،3 ستاۆكامەن، ياعني تولىق ەمەس جۇمىس كۇنىمەن جۇمىس ىستەيتىن 4 پوشتاشى عانا الادى. 0،3 ستاۆكا بويىنشا جۇمىس ۋاقىتى ايىنا 24 ساعاتتى قۇرايدى (تولىق مولشەرلەمە نورماسىمەن – 176 ساعات). قازىرگى ۋاقىتتا "قازپوشتا" اق-دا جۇمىس كولەمىنىڭ تومەندەۋىنە بايلانىستى تولىق ەمەس جۇمىس كۇنىمەن جۇمىس ىستەيتىن قىزمەتكەرلەردىڭ سانى (0،4، 0،5، 0،6، 0،7، 0،8 جانە 0،9) 47 ادامدى قۇرايدى" دەدى "قازپوشتا" وكىلى.