قوستاناي وبلىسىنداعى الاپات ورتكە قاتىسى بار العاشقى كۇدىكتى قاماۋعا الىندى. قولىنا كىسەن سالىنعان باسامان ورمان شارۋاشىلىعى مەكەمەسىنىڭ باسشىسىنا لاۋازىم وكىلەتىن تەرىس پايدالانىپ، اۋىر زارداپقا اكەپ سوقتىردى دەگەن ايىپ تاعىلعان، دەپ حابارلايدى ulysmedia.kz. 

جالپى، تابيعي اپاتتان كەيىن وبلىستىق پروكۋراتۋرا 3 بىردەي قىلمىستىق ءىس بويىنشا تەرگەۋ جۇرگىزىپ جاتىر.

"اۋليەكول اۋدانىندا ورمان قورىنىڭ ورتەنۋ فاكتىسى بويىنشا بيىل 4-قىركۇيەكتەن باستاپ پروكۋراتۋرامەن قك 202-بابىنىڭ 3-بولىگى، اتاپ ايتقاندا، اۋىر زارداپتارعا اكەپ سوققان نەمەسە اسا ءىرى زالال كەلتىرىلگەن بىرەۋدىڭ مۇلكىن قاساقانا ءبۇلدىرۋ جانە قك 341-بابى 2-بولىگى ورمانداردى جويۋ نەمەسە ءبۇلدىرۋ بويىنشا قىلمىستىق ىستەر تەرگەلۋدە"، دەيدى قوستاناي وبلىسى پروكۋراتۋراسىنىڭ باسقارما پروكۋرورى نۇرسۇلتان ساتۋبالدين. 

بيىل 15-قىركۇيكتە سوتپەن مەكەمە باسشىسىنا قاتىستى كۇزەتپەن ۇستاۋ تۇرىندەگى بۇلتارتپاۋ شاراسىنا سانكسيا بەرىلدى. تەرگەۋ جالعاسۋدا. قۇزىرلى ورگاننىڭ مالىمەتىنشە، كۇللى ەلدى ەسەڭگىرەتكەن قوستانايداعى ءورت باسامان ورمان شارۋاشىلىعىندا باستالعان بولاتىن. سول ۋاقىتتا مەكەمەنىڭ باسشىسى وت تۇتانعان اۋماققا ورمانشىلار بارماعان دەپ اشىق ايتقان. ءقازىر كۇدىككە ىلىنگەن اسحات جاقاشيەۆ بەسىنشى دارەجەلى ورتپەن كۇرەسۋگە قاۋقارسىزبىز دەپ ايتقان ەدى. سودان كەيىن قىزىل جالىن كۇش الىپ، تۇتاس اۋليەكول اۋدانىنا تارالعان.

ءورت سوندىرۋشىلەر اپتا بويى الىسقان ءتىلسىز جاۋ 43 مىڭ گەكتار ورمان القابى مەن 91 ءۇيدى كۇلگە اينالدىردى. ءبىر ادامنىڭ ءمايىتى ءۇيىندىنىڭ اراسىنان تابىلدى. ەكى مىڭعا جۋىق ادام ءقاۋىپسىز جەرگە كوشىرىلدى. ءۇيى مەن دۇنيە-مۇلكىنەن ايىرىلعان جاندارعا ءقازىر جاڭا ءۇي سالىنىپ جاتىر. قۇرىلىس ەكى جارىم ايدا اياقتالادى دەپ جوسپارلانعان. ورتتەن زارداپ شەككەن اۋىل اعايىنىنا ەلدىڭ تۇكپىر-تۇكىپىرىنەن گۋمانيتارلىق جانە قارجىلاي قولداۋ كورسەتىلىپ جاتىر.