بۇگىن قونايەۆ قالالىق اۋرۋحاناسىنىڭ اۋماعىندا مەديسينا قىزمەتكەرلەرىنە 35 جاڭا اۆتوكولىكتىڭ كىلتىن تاپسىرۋ ءراسىمى ءوتتى.

ءىس-شاراعا الماتى وبلىسىنىڭ اكىمى مارات سۇلتانعازييەۆ قاتىستى. قۇتتىقتاۋ سوزىندە ول وڭىردە مەديسينا سالاسىنا كوپ كوڭىل بولىنەتىنىن اتاپ ءوتتى.

– ۋاقتىلى شۇعىل كومەك كورسەتۋ ءۇشىن ءبىز بريگادالاردى كوبەيتىپ، سانيتارلىق كولىكتى جاڭارتىپ جاتىرمىز. وبلىس ءۇشىن ليزينگ بويىنشا 35 ماشينا ءبولىندى، ونىڭ 7-ەۋى قونايەۆ قالاسىنا تيەسىلى. مەنىڭ ويىمشا، ەندىگىدە جۇمىس ىستەۋ جاعدايى ءبىرشاما جەڭىلدەيدى، ويتكەنى جاڭا «جەدەل جاردەم» كولىگى زاماناۋي تەحنيكامەن جابدىقتالعان. جۇمىستارىڭىزعا ساتتىلىك تىلەيمىز، - دەدى مارات سۇلتانعازييەۆ.

ايتا كەتەيىك، جەرگىلىكتى بيۋدجەت ەسەبىنەن Hyundai H-350 جانە JAC Sunray ماركالى سانيتارلىق كولىكتىڭ 35 بىرلىگى ساتىپ الىندى.

الماتى وبلىسى دەنساۋلىق ساقتاۋ باسقارماسىنىڭ باسشىسى ءومىرزاق نيازبەكوۆتىڭ ايتۋىنشا، بارلىق اۆتوكولىكتەر قاجەتتى جابدىقتارمەن جابدىقتالعان، بۇل ساپالى جانە شۇعىل كومەك كورسەتۋگە مۇمكىندىك بەرەدى.

– جەدەل جانە شۇعىل مەديسينالىق كومەكتى 142 بريگادا كورسەتەدى. سانيتارلىق اۆتوكولىك پاركىن تولىقتىرۋ ەسەبىنەن جەدەل جانە شۇعىل مەديسينالىق كومەك بريگادالارىنىڭ سانىن 8-گە ۇلعايتۋ جانە اۋىلدىق ەلدى مەكەندەردىڭ مەديسينالىق ۇيىمدارىنان قاشىقتىقتى ەسكەرە وتىرىپ، ولاردىڭ سانىن 150-گە دەيىن جەتكىزۋ جوسپارلانۋدا، بۇل اۆتوپاركتى جاڭارتۋعا جانە تولىقتىرۋعا مۇمكىندىك بەرەدى. مۇنىڭ ءبارى وبلىس حالقى ءۇشىن جەدەل جانە شۇعىل مەديسينالىق كومەكتى 100% ۋاقىتىلى كورسەتۋگە مۇمكىندىك بەرەدى، -دەدى ءومىرزاق نيازبەكوۆ.

ەستەرىڭىزگە سالا كەتەيىك، «جەدەل جاردەمنىڭ» بارلىق 35 كولىگى جامبىل، بالقاش، كەگەن، رايىمبەك، ۇيعىر، تالعار، قاراساي اۋداندارىنىڭ، سونداي-اق بورالداي مەن قونايەۆ قالالارىنىڭ شاقىرۋلارىنا قىزمەت كورسەتۋ ءۇشىن ديسلوكاسيالار بويىنشا بولىنەدى.