ەكس-پرەزيدەنت نۇرسۇلتان نازاربايەۆ تۇركيانىڭ انتاليا قالاسىنداعى "Rixos" ءقوناقۇيىن ق ر پرەزيدەنتى ءىس باسقارماسىنىڭ مەنشىگىنە وتكىزدى، دەپ حابارلادى Forbes.kz باسىلىمى. 

باسىلىم مالىمەتىشە، ناۋرىز ايىنىڭ اياعىندا ۇكىمەت جانىنان ەكونوميكانى مونوپولياسىزداندىرۋ جونىندەگى كوميسسيا قۇرىلعاننان باستاپ بەلگىلى ءبىر اكتيۆتەردىڭ مەملەكەتتىك مەنشىككە، نەگىزىنەن سىيعا تارتۋ شارتى نىسانىندا اۋىسقانى تۋرالى اقپارات اندا-ساندا جاريالانىپ كەلەدى. ۇكىمەت مۇنداي "سىيلىقتاردى" قابىلداۋدى ءتيىستى قاۋلىمەن بەكىتەدى.

بيىل مەملەكەتكە قايتارىلعان مۇلىكتەر جونىندە رەسمي اقپارات جاريالانبادى. مىسالى، نۇرسۇلتان نازاربايەۆ تا قىمبات مۇلىكتى قايتارۋعا ءماجبۇر بولعانىن كوبى بىلە بەرمەيدى. بۇل – نۇرسۇلتان نازاربايەۆقا تيەسىلى تۇركيانىڭ انتاليا قالاسىندا ورنالاسقان Rixos Beldibi ءقوناقۇيى. اتالعان مۇلىك قازاقستاندا  "الاتاۋ ءقوناقۇيى" اق رەتىندە تىركەلگەن.

2021 جىلعى 31 جەلتوقسانداعى جاعداي بويىنشا اۋديتتەلگەن قارجىلىق ەسەپكە سايكەس، ءقوناقۇيدىڭ 23%-دان ءسال استامىنا مەملەكەتتىك مۇلىك جانە جەكەشەلەندىرۋ كوميتەتى، 77%-ىنا "جىلجىمايتىن مۇلىكتى باسقارۋ ديرەكسياسى" ج ش س يەلىك ەتكەن. سوڭعىسى جەكە "ەلباسى قورىنا" تيەسىلى. ال قور نازاربايەۆتىكى. 

ۇكىمەتتىڭ 2022 جىلعى 15 اقپانداعى №62 قاۋلىسىنا، قبپ گريفىمەن (قىزمەتتىك پايدالانۋ ءۇشىن)، سونداي-اق 1 ناۋرىزداعى قابىلداۋ-تاپسىرۋ اكتىسىنە سايكەس، ەكونوميكانى مونوپولياسىزداندىرۋ جونىندەگى كوميسسيا قۇرىلعانعا دەيىن دە مەملەكەتتىك مۇلىك جانە جەكەشەلەندىرۋ كوميتەتى "الاتاۋ" قوناق ءۇيى" اق مەملەكەتتىك اكسيالار پاكەتىن يەلەنۋ جانە پايدالانۋ قۇقىعىن ق ر پرەزيدەنتى ءىس باسقارماسىنا بەرگەن. 16 اقپاندا "جىلجىمايتىن مۇلىكتى باسقارۋ ديرەكسياسى" ج ش س كومپانيا اكسيونەرلەرىنىڭ قۇرامىنان شىقققان. بۇل رەتتە ءقوناقۇيدىڭ اۋديتتەلگەن قارجىلىق ەسەبىندە قازاقستان ەكس-پرەزيدەنتىنىڭ ۇلەسىن اۋىستىرۋ ادىسىنە قاتىستى قوسىمشا تۇسىنىكتەمەلەر جوق. بۇل ساتىپ الۋ-ساتۋ مامىلەسى مە، الدە سىيلىق شارتى ما، بەلگىسىز بولىپ قالا بەرمەك.

ءقازىر ءقوناقۇي تولىعىمەن ق ر پرەزيدەنتى ءىس باسقارماسىنىڭ يەلىگىنە ءوتتى.