پرەزيدەنت ق.توقايەۆ ۇكىمەتتىڭ كەڭەيتىلگەن وتىرىسىندا ۇكىمەت بيىل ەلىمىز تاپ بولعان سىن-قاتەرلەرگە قارسى ءتيىمدى جۇمىس ىستەي الماعانىن ايتىپ، مينيسترلەر كابينەتىن وتستاۆكا جىبەرۋ-جىبەرمەۋ ماسەلەسىن تالقىلاۋ كەرەكتىگىن ءمالىم ەتتى.

– قويىلعان مىندەتتەر تولىققاندى ورىندالعان جوق. ال كەيبىر باعىتتار بويىنشا مۇلدە جۇمىس جاسالعان جوق. مىسالى، ابدەن ەسكىرگەن، قاجەتى جوق نورماتيۆتىك اكتىلەردى جويۋ كەرەك ەكەنى وسىعان دەيىن دە بىرنەشە رەت ايتىلدى، ۇكىمەتكە ءتيىستى تاپسىرمالار دا بەرىلدى. سونىڭ كەسىرىنەن مينيسترلەر جانە مەكەمە باسشىلارى وزدىگىنەن ارەكەت ەتىپ، جەدەل شەشىم قابىلداي المايدى. بىتپەيتىن جينالىستارعا، قۇجاتتى كەلىسۋ جۇمىسىنا وتە كوپ ۋاقىت كەتەدى. مينيسترلىك جانە ۇلتتىق كومپانيا باسشىلارى ناقتى شەشىم قابىلداۋعا كەلگەندە، وزدەرىنە جاۋاپكەرشىلىك الۋدان باستارىن الىپ قاشادى. ال تۇتاس ەلدىڭ، حالىقتىڭ تاعدىرى سول ماڭىزدى شەشىمگە بايلانىستى بولىپ جاتاتىنى، وكىنىشكە قاراي، ەسكەرىلمەيدى. ۇكىمەت پەن پرەزيدەنت اكىمشىلىگى اراسىنداعى ءوزارا ءىس-قيمىل دۇرىس جولعا قويىلماعان. جۇرتشىلىق ۇكىمەتتىڭ دە، بارلىق دەڭگەيدەگى اكىمدەردىڭ دە جۇمىسىنا قاتىستى ارىز-شاعىم ايتۋدا. حالىقتىڭ ءسوزىنىڭ جانى بار. ويتكەنى شىن مانىندە، كۇن كورۋ قيىنداپ بارادى، باعا شارىقتاپ وسۋدە. قالاداعى جانە اۋىلداعى تۇرعىنداردىڭ ءومىرى ءۇشىن اسا ماڭىزدى ينفراقۇرىلىمنىڭ توزىعى جەتكەن، ءتىپتى، مۇشكىل حالدە دەسەك تە ارتىق ەمەس. مۇنداي كەزدە قول قۋسىرىپ، جايباراقات وتىرۋعا بولمايدى. وسىنداي جاعداي بارىمىزگە ءقاۋىپ توندىرەتىنى انىق. ونىڭ ۇستىنە، كەلەسى جىل قازىرگىدەن دە كۇردەلى، قيىن بولۋى ابدەن مۇمكىن، – دەدى ول.

وسىنداي سىننان كەيىن پرەزيدەنت ۇكىمەت وتستاۆكاسى تۋرالى ويىن ورتاعا سالىپ، ونى الداعى ۋاقىتتا تالقىعا سالۋ كەرەكتىگىن جەتكىزدى.

– ۇكىمەتتىڭ نەگىزگى مىندەتى – ەلىمىزدەگى ەكونوميكالىق ماسەلەلەردى شەشۋمەن اينالىسۋ. بۇل – ۇكىمەت مۇشەلەرىنىڭ، اكىمدەردىڭ، ۇلتتىق كومپانيا باسشىلارىنىڭ تىكەلەي جاۋاپكەرشىلىگى. سوندىقتان مەن پرەمەر-مينيستر ءاليحان اسحان ۇلى سمايىلوۆتان شىنايى جاۋاپ العىم كەلەدى. جالپى، جاڭا جىلعا ۇكىمەتتىڭ وسى قۇرامىمەن اياق باسۋعا بولا ما؟ پرەزيدەنتتىڭ سايلاۋالدى باعدارلاماسىن جۇزەگە اسىرۋ ۇكىمەتتىڭ قولىنان كەلە مە؟ ۇكىمەت ىشتەن جانە سىرتتان بولاتىن بارلىق ەكونوميكالىق قاۋىپ-قاتەرلەرگە قارسى تۇرا الا ما؟ مەنىڭشە، بۇل ماسەلەلەر مەملەكەت باسشىسىنىڭ پرەمەر-مينيسترمەن جانە پارلامەنت دەپۋتاتتارىمەن وتكىزەتىن كونسۋلتاسيالارى كەزىندە مۇقيات تالقىلانۋى كەرەك، – دەدى ول.