ىشكى ىستەر مينيسترلىگى اكىمشىلىك پوليسيا كوميتەتى ءتوراعاسىنىڭ مىندەتىن اتقارۋشى قايسار سۇلتانبايەۆ شەتەلدەن 1 قىركۇيەككە دەيىن كىرگىزىلگەن اۆتوكولىكتەر قالاي زاڭداستىرىلاتىنىن ايتىپ بەردى.

سۇلتانبايەۆتىڭ سوزىنشە، ىزدەۋدە جۇرگەن (قىلمىستىق كولىك) نەمەسە تولىق كەدەندىك تازارتۋدان وتپەگەن سونداي-اق 2022 جىلدىڭ 1 قىركۇيەگىنەن كەيىن اكەلىنگەن اۆتوكولىكتەردەن وزگەسىنىڭ ءبارى زاڭداستىرىلادى. ءتىپتى وسى تالاپتارعا كەلەتىن "وڭ ءرۋلدى" كولىكتەر دە، سارى نومەرمەن جۇرگەن كولىكتەر دە قازاقستان نومەرىن الادى.

اۆتوكولىكتەردىڭ شىعارىلعان جىلى مەن ەكولوگيالىق كلاسىنا شەكتەۋ جوق. دەمەك جىلى جاڭا دا، ەسكىلەۋ دە كولىكتەر زاڭداستىرىلادى.

كوميتەت ءتوراعاسى مىندەتىن اتقارۋشىنىڭ دەرەگىنشە، ەلگە 1 قىركۇيەككە دەيىن 300 مىڭنان استام كولىك كىرگىزىلگەن. ولار اۆتوساقتاندىرۋ ءپوليسى ارقىلى انىقتالعان.

– اۆتوساقتاندىرۋلاردىڭ ەڭ كوبى رەسەيدەن كەلگەن اۆتوكولىكتەرگە بەرىلگەن، ولار شامامەن 260 مىڭ، قىرعىزستان اۆتوكولىكتەرى – 25،5 مىڭ جانە ارمەنيا كولىكتەرى – 18 مىڭ، – دەيدى ول.

شەتەلدىك اۆتوكولىكتەردى زاڭداستىرۋ قاجەتتى زاڭنامالىق وزگەرىستەر كۇشىنە ەنىپ، ءتيىستى ۇكىمەت قاۋلىسى قابىلدانعاننان كەيىن باستالادى. زاڭداستىرۋدى جارتى جىلدىڭ كولەمىندە وتكىزۋ جوسپارلانىپ وتىر.

اۆتوكولىكتىڭ قازاقستانعا كىرۋ كۇنى شەكارا قىزمەتىنىڭ دەرەكتەر بازاسى بويىنشا ايقىندالادى. شەكارا قىزمەتىندە كولىك قۇرالىن اكەلۋ تۋرالى مالىمەتتەر بولماعان جاعدايدا اۆتوكولىكتىڭ قازاقستان رەسپۋبليكاسىندا ناقتى بولۋ كۇنى اۆتوساقتاندىرۋ ءپوليسىنىڭ العاشقى رەسىمدەلگەن كۇنى بويىنشا ايقىندالاتىن بولادى. 

زاڭداستىرۋ ءۇشىن 200 مىڭ تەڭگە، تەحپاسپورت پەن مەملەكەتتىك ءنومىر ءۇشىن تاعى 13 171 تەڭگە تولەۋ قاجەت. 2023 جىلعى 1 قاڭتاردان باستاپ مەملەكەتتىك ءنومىر مەن تەحنيكالىق پاسپورت ءۇشىن تولەم سوماسى اەك مولشەرىنە بايلانىستى ءسال وزگەرەدى.

زاڭداستىرۋعا ءوتىنىشتى “ەلەكتروندىق ۇكىمەت” پورتالى نەمەسە ارنايى حالىققا قىزمەت كورسەتۋ ورتالىعى ارقىلى جۇرگىزىلەدى. ۇسىنىلعان قۇجاتتار مەن كولىك قۇرالى ىزدەستىرۋ بازالارى بويىنشا تەكسەرىلەدى. ودان كەيىن اۆتوكولىك ارنايى حالىققا قىزمەت كورسەتۋ ورتالىعىنىڭ تەكسەرۋ پۋنكتىنە نومىرلىك اگرەگاتتاردى سالىستىرۋ ءۇشىن ۇسىنىلادى. سودان كەيىن ەگەر تالاپ ەتىلسە، اۆتوكولىككە كەدەندىك دەكلاراسيالاۋ جۇرگىزىلەدى، 200 مىڭ تەڭگە مولشەرىندە باستاپقى الىم، سونداي-اق تەحپاسپورت پەن مەملەكەتتىك ءنومىر ءۇشىن مەملەكەتتىك باج تولەنەدى. تىركەۋ بەكىتىلگەننەن كەيىن اۆتوكولىك يەسىنە قازاقستاندىق تەحپاسپورت جانە مەملەكەتتىك ءنومىر بەرىلەدى.

دەرەككوز: polisia.kz