پرەزيدەنت ق.توقايەۆ ەلدە قويما ينفراقۇرىلىمىنىڭ كەنجەلەۋى ازىق-تۇلىك باعاسىنا اسەر ەتىپ وتىرعان سەبەپتەردىڭ ءبىرى ەكەنىن ايتتى. بۇل تۋرالى ۇكىمەتتىڭ كەڭەيتىلگەن وتىرىسىندا جەتكىزدى.

– ازىق-تۇلىك باعاسىن وسىرمەۋ ءۇشىن نەگىزگى باعىتتار بويىنشا ناقتى جۇمىس جۇرگىزۋ كەرەك. ءونىمنىڭ وزىندىك قۇنىن تومەندەتۋ، قاجەتسىز دەلدالدان ارىلۋ تۋرالى ءبىز بىرنەشە رەت ايتتىق. ساۋدا جەلىلەرىن قولجەتىمدى ەتىپ، اينالىمعا قارجى سالۋ ءۇشىن ارزان نەسيە بەرۋ ءتاسىلىن دە قولدانۋعا بولادى. بۇل باعىتتا العاشقى قادامدار جاسالدى. تاۋار وندىرۋشىدەن الدىن-الا تىكەلەي ساتىپ الۋ ەرەجەسى قابىلداندى. بيۋدجەتتەن قارجى بولىنەتىن بولدى. دەگەنمەن كوپتەگەن شارۋانىڭ كوكونىس ساقتايتىن جەرى جوق. سول سەبەپتى، ولار ونىمدەرىن ەگىس باسىنان تىكەلەي ساتۋعا ءماجبۇر بولادى. ونىڭ سالدارى بارىمىزگە بەلگىلى. اۋىل تۇرعىندارى ءبىراز تابىسىنان قاعىلادى. ازىق-تۇلىكتىڭ باعاسى جىل مەزگىلىنە قاراي قاتتى وزگەرەدى. كۇزدە سۋ تەگىن نارسە كوكتەمدە شارىقتاپ شىعا كەلەدى. مۇنىڭ شەشىمى بىرەۋ عانا – قويما ينفراقۇرىلىمىن جاساۋ كەرەك. ءبىراق بۇل باعىتتاعى جۇمىس باياۋ ءجۇرىپ جاتىر، – دەگەن پرەزيدەنت بىلتىر 83 مىڭ توننا ءونىم ساقتايتىن قويما سالۋ كوزدەلگەنىن، الايدا جوسپار 64 مىڭ تونناعا عانا ورىندالعانىن اتاپ ءوتتى.

ال بيىل جۇمىس ءبىرشاما جاندانا تۇسكەن. 98 مىڭ توننالىق قويما سالۋ جوسپارلانىپ، سونىڭ 87 مىڭ تونناسى ءقازىردىڭ وزىندە ىسكە قوسىلعان.